ଆଗକୁ ଜଳ ସଂକଟ : କରୋନା ଯୋଗୁଁ ପାନୀୟ ଜଳ ଅପଚୟ ବଢ଼ୁଛି

ଚଳିତ ବର୍ଷ ଜଳ ସଙ୍କଟ ଯେ ଉତ୍କଟ ହେବ, ତାହା ଏବେଠାରୁ ଜଳଜଳ ହୋଇ ଦିଶିଲାଣି। ବିଶେଷକରି କରୋନା ପ୍ରଭାବରେ ଏହି ସଙ୍କଟ ଆହୁରି ଘନୀଭୂତ ହୋଇଛି। ଜଳବାୟୁ ପରିବର୍ତ୍ତନର ପ୍ରଭାବରେ ବିଶ୍ୱ ଆଗରେ ଜଳସଙ୍କଟ ଏକ ପ୍ରମୁଖ ସମସ୍ୟା ରୂପେ ଦେଖାଦେଇଛି। ଅପରପକ୍ଷରେ ଭାରତର ସ୍ଥିତି ଏତେ ସଙ୍କଟଜନକ ନୁହେଁ ବୋଲି ମତ ପ୍ରକାଶ ପାଇ ଆସୁଥିଲା, କିନ୍ତୁ ଗତବର୍ଷର ସ୍ଥିତି ଦେଖିବା ପରେ ପରିବେଶବିତ୍ ଓ ବିଶେଷଜ୍ଞମାନେ ସେମାନଙ୍କ ମତ ପରିବର୍ତ୍ତନ କରିବା ପାଇଁ ବାଧ୍ୟ ହୋଇଛନ୍ତି। ନିତି ଆୟୋଗ ମଧ୍ୟ ଭାରତରେ ଜଳସଙ୍କଟ ଉତ୍କଟ ହେବାକୁ ଯାଉଛି ବୋଲି ସତର୍କ ଘଣ୍ଟି ବଜାଇ ସାରିଛି। ପାନୀୟ ଜଳ ସଙ୍କଟ ଯୋଗୁଁ ତାମିଲନାଡ଼ୁ, ମହାରାଷ୍ଟ୍ର ଓ ରାଜସ୍ଥାନରେ ଗତ ବର୍ଷ ଜୀବନଯାତ୍ରା ଅଚଳ ହୋଇଯାଇଥିଲା। ଏପରିକି କେତେକ ଅଞ୍ଚଳରେ ପିଇବା ପାଣି ପାଇଁ ରକ୍ତାକ୍ତ ସଂଘର୍ଷ ଘଟିଥିବାର ଖବର ମିଳିଥିଲା। ବର୍ତ୍ତମାନ ପର୍ଯ୍ୟନ୍ତ ପାଣିପାଗର ସ୍ଥିତି ଓ ପ୍ରକୃତିକୁ ଅନୁଧ୍ୟାନ କଲେ ଚଳିତବର୍ଷ ଜଳସଙ୍କଟ ଗତ ବର୍ଷ ତୁଳନାରେ ଉତ୍କଟ ହେବ ବୋଲି ପରିବେଶବିତମାନେ ଆଶଙ୍କା କରିଛନ୍ତି। ବିଶ୍ୱ ମହାମାରୀର ରୂପ ନେଇଥିବା କରୋନା ଏହି ସଙ୍କଟକୁ ଆହୁରି ସଙ୍ଗିନ କରିଛି। ସଂକ୍ରମଣରୁ ରକ୍ଷା ପାଇଁ ନିୟମିତ ଓ ବାରମ୍ବାର ହାତ ଧୋଇବା ଅଭ୍ୟାସ ବ୍ୟତୀତ ବିକଳ୍ପ ନାହିଁ। ଏଥିସହିତ ଚଟାଣ, କାନ୍ଥ, ପୋଷାକ, ଆସବାବପତ୍ର, ଗାଡ଼ି, ଫଳ, ପନିପରିବାକୁ କରୋନାମୁକ୍ତ କରିବା ପାଇଁ ପ୍ରଚୁର ପରିମାଣର ପାନୀୟ ଜଳ ଅପଚୟ ହେଉଛି। ସ୍ଥିତିରେ ଯଥାସମ୍ଭବ ଉନ୍ନତି ନ ଘଟିଲେ ଏବଂ ଏହି ଅଭ୍ୟାସ ଆଉ କିଛିଦିନ ଜାରି ରହିଲେ ସମଗ୍ର ବିଶ୍ୱରେ ଉତ୍କଟ ପାନୀୟ ଜଳ ସଙ୍କଟ ସୃଷ୍ଟି ହେବା ନିଶ୍ଚିତ। ବିଶ୍ୱରେ ଦୂଷିତ ପାନୀୟ ଜଳ ବ୍ୟବହାରଜନିତ ମୃତ୍ୟୁ ଓ ରୋଗାକ୍ରାନ୍ତ ସଂଖ୍ୟା ମଧ୍ୟ କରୋନା ତୁଳନାରେ କମ୍ ନୁହେଁ। କରୋନା ସଂକ୍ରମଣ ଆଶଙ୍କା ଦୂର ହେବା ପରେପରେ ପାନୀୟ ଜଳ ସଙ୍କଟ ଘନୀଭୂତ ହେବ। ଏଥିପାଇଁ ଆମେ ବେଳ ହୁଁ ସତର୍କ ରହିବା ବୁଦ୍ଧିମାନର କାର୍ଯ୍ୟ ହେବ।