ବୁର୍ଲା: ଜଣେ ମଦ୍ୟପ ଗାଡି ଚାଳକଙ୍କ ଉନ୍ମୁକ୍ତ କାଣ୍ଡ ବୁର୍ଲା ଥାନା ଅଞ୍ଚଳରେ ଆଜି ଚର୍ଚ୍ଚାର ବିଷୟ ପାଲଟି ଥିଲା। ନିଶାସକ୍ତ ଅବସ୍ଥାରେ ଦୃତ ଗାଡି ଚାଲାଣ କରି ଜଣେ ବାଇକ ଆରୋହୀକୁ ଗୁରୁତର ଆହତ କରିବା ସହିତ ଏକାଧିକ ଗାଈ ଏବଂ ବାଛୁରୀଙ୍କ ଉପରେ ଚଢ଼ାଇ ଦେବା ଫଳରେ ଦୁଇଟି ଗାଈ ଏବଂ ବାଛୁରୀଙ୍କ ଶୋଚନୀୟ ମୃତ୍ୟୁ ଘଟିଛି। ଶେଷରେ ବୁର୍ଲା ପୁଲିସ ଗାଡି ଏବଂ ଚାଳକକୁ କାବୁ କରି ବୁର୍ଲା ଥାନାକୁ ଆଣିଥିବା ବେଳେ ଥାନାରେ ମଧ୍ୟ ଯୁବକଙ୍କ ଉନ୍ମକ୍ତ କାଣ୍ଡ ଦେଖିବାକୁ ମିଳିଥିଲା।
ସୁଚନା ଅନୁସାରେ ସମ୍ବଲପୁର ଗୋଲବଜାର ଅଞ୍ଚଳର ଏକ କ୍ରେଟା ଗାଡି ଆଜି ରାତି ପ୍ରାୟ ୯ଟା ସମୟରେ ଦ୍ରୁତ ଗତିରେ ସମ୍ବଲପୁରରୁ ଗୋଶାଲା ଅଭିମୂଖେ ଯାଉଥିଲା। ତେବେ ହିରାକୁଦ ରେଳଷ୍ଟେସନ ସମ୍ମୁଖରେ ଏକ ବାଇକ ଆରୋହୀଙ୍କୁ ଧକ୍କା ଦେଇ ଦ୍ରୁତ ଗତିରେ ଗୋଶାଲା ଅଭିମୂଖେ ଯାଇ ଚିପିଲିମା ପଟେ ଫେରାର ହୋଇଯାଇଥିଲା। କିଛି ସ୍ଥାନୀୟ ଲୋକେ ପିଛା କରିବାରୁ ସେ ଗୋଶାଳାରୁ ପୁଣି ଚାଉଁରପୁର ଅଭିମୂଖେ ଯାଇଥିଲା। ଚାଉଁରପୁର ନିକଟରେ ରାସ୍ତାକଡରେ ଥିବା ଏକ ଗାଈ ପଳକୁ ଧକ୍କା ଦେଇଥିଲା। ଦୁର୍ଘଟଣାରେ ୨ଟି ଗାଈ ଏବଂ ଗୋଟିଏ ବାଛୁରୀର ଘଟଣାସ୍ଥଳରେ ହିଁ ଶୋଚନୀୟ ଭାବରେ ମୃତ୍ୟୁ ଘଟିଥିବା ବେଳେ ଅନ୍ୟ ଏକ ବାଛୁରୀ ଗୁରୁତର ଭାବରେ ଆହତ ହୋଇଥିବା ଜଣାପଡିଛି। ଏହାପରେ ବୁର୍ଲା ପୁଲିସ ସେଠାରେ ପହଂଚି ଗାଡି ଚାଳକ ତଥା ମାଲିକ ସମିର ନାୟକ(୨୪)କୁ ପୁଲିସ କାବୁ କରି ଥାନାକୁ ଆଣିଥିବା ଜଣାପଡିଛି।
ତେବେ ଉକ୍ତ ବ୍ୟକ୍ତି ଜଣକ ପୁଣି ଥାନାକୁ ଅଣାଯିବା ପରେ ମଧ୍ୟ ଏତେ ମାତ୍ରାରେ ନିଶାରେ ଚୁର ଥିଲା ଯେ ପୁଲିସ ଅଧିକାରୀମାନଙ୍କୁ ମଧ୍ୟ ଥାନା ଭିତରେ ଦୁର୍ବ୍ୟବହାର କରିଥିଲା। ତେବେ ଏହି ଗାଡି ଧକ୍କାରେ ଆହତ ଯୁବକ ଜଣକ ବୁର୍ଲା ସହରର ଗଉଡପାଲିର ବୋଲି ଜଣାପଡିଛି। ତାଙ୍କୁ ପୁଲିସ ଉଦ୍ଧାର କରି ବୁର୍ଲା ଭିମସାରରେ ଚିକିତ୍ସା ପାଇଁ ଭର୍ତ୍ତି କରିଥିବା ବୁର୍ଲା ଥାନାଧିକାରୀ ବିଭୂତି ଭୂଷଣ ଭୋଈ ସୂଚନା ଦେଇଛନ୍ତି। ତେବେ ଗାଡି ଚଲାଉଥିବା ବ୍ୟକ୍ତି ଜଣକ ନିଜେ ମାଲିକ ଏବଂ ପ୍ରଚୁର ନିଶାସେବନ କରିଥିବା ମଧ୍ୟ ଥାନାଧିକାରୀ ଶ୍ରୀ ଭୋଇ ସ୍ପଷ୍ଟ କରିଛନ୍ତି। ଉକ୍ତ ମଦ୍ୟପ ଚାଳକକୁ ଗିରଫ୍ କରିବା ପାଇଁ ପଶୁପ୍ରେମୀ ମହଲରେ ଦାବି ହେଉଛି।
