କେନ୍ଦୁଝରଗଡ଼: ବିଶୁଦ୍ଧ ପାନୀୟଜଳ ଯୋଗାଣ ଦାବିରେ ସୋମବାର ଜିଲା ପ୍ରଶାସନ ନିକଟରେ ଲିଖିତ ଭାବେ ଫେରାଦ ହୋଇଛନ୍ତି ସଦର ବ୍ଲକ ହାଣ୍ଡିଭଙ୍ଗା ପଞ୍ଚାୟତ କାଠବାଉଁଶୁଳୀ ଗ୍ରାମର ମହିଳାମାନେ। ଗ୍ରୀଷ୍ମ ଋତୁ ଆରମ୍ଭ ପୂର୍ବରୁ ଜିଲାରେ ଉତ୍କଟ ପାନୀୟଜଳ ସଙ୍କଟ ପ୍ରଶାସନ ପାଇଁ ଏବେଠାରୁ ଚ୍ୟାଲେଞ୍ଜ ସୃଷ୍ଟି କରିଛି। ୨୦୨୪ ଶେଷସୁଦ୍ଧା ଜିଲାର ପ୍ରତି ଘରକୁ ପାଇପ ଯୋଗେ ପାନୀୟଜଳ ଯୋଗାଣ ନେଇ ପ୍ରଶାସନ ପକ୍ଷରୁ ବାରମ୍ବାର କୁହାଯାଇ ଆସୁଥିଲେ ମଧ୍ୟ ବାସ୍ତବରେ ଏହା କାର୍ଯ୍ୟକ୍ଷମ ହୋଇନପାରିବା ଏବେ ଜିଲାବାସୀଙ୍କୁ ପାଣି ପାଇଁ ରାଜରାସ୍ତାକୁ ଓହ୍ଲାଇବା ଭଳି ପରିସ୍ଥିତି ସୃଷ୍ଟି କରିଛି। ସଦର ବ୍ଲକ ହାଣ୍ଡିଭଙ୍ଗା ପଞ୍ଚାୟତ କାଠବାଉଁଶୁଳୀ ଗ୍ରାମ ୪ଟି ୱାର୍ଡକୁ ନେଇ ଗଠିତ ହୋଇଥିବାବେଳେ ଏଠାରେ ୧୩୦୦ରୁ ଊର୍ଦ୍ଧ୍ବ ଲୋକ ବସବାସ କରନ୍ତି। ପାନୀୟଜଳ ପାଇଁ ଗ୍ରାମବାସୀ ନଳକୂପ ଉପରେ ନିର୍ଭର କରୁଥିବାବେଳେ ଅଧିକାଂଶ ସମୟ ନଳକୂପ ଅଚଳ ରହିବା ସାଙ୍ଗକୁ ଦୂଷିତ ପାଣି ବାହାରୁ ଥିବାରୁ ଲୋକେ ବାଧ୍ୟ ହୋଇ ଚୁଆ ଖୋଳି ନଚେତ୍ ପୋଖରୀର ଦୂଷିତ ପାଣିକୁ ପାନୀୟଜଳ ଭାବେ ବ୍ୟବହାର କରି ବହୁ ଦୂରାରୋଗ୍ୟ ବ୍ୟାଧିରେ ପୀଡିତ ହୋଇ ଆସୁଥିବା ୱାର୍ଡସଭ୍ୟ ଦୟାନିଧି ନାଏକ କହିଛନ୍ତି। ଏଭଳି ସ୍ଥିତିରେ ଗ୍ରୀଷ୍ମଋତୁ ପୂର୍ବରୁ ଗ୍ରାମବାସୀଙ୍କୁ ବିଶୁଦ୍ଧ ପାନୀୟଜଳ ଯୋଗାଇ ଦେବାକୁ କଜ୍ୱଳ ଆରୁକ, ସରସ୍ୱତୀ ଆରୁକ, ଦମୟନ୍ତୀ ନାଏକ, କୁନ୍ତଳା ନାଏକଙ୍କ ନେତୃତ୍ୱରେ ଶତାଧିକ ମହିଳା ସୋମବାର ଜିଲା ପ୍ରଶାସନ ନିକଟରେ ଲିଖିତ ଭାବେ ଫେରାଦ ହୋଇଛନ୍ତି।
Comments are closed.