ଡେସ୍କ: ପ୍ରଖ୍ୟାତ ମାନସିକ ରୋଗ ବିଶେଷଜ୍ଞ ତଥା ଓଡ଼ିଶାର ବିଶିଷ୍ଟ ବ୍ୟକ୍ତିତ୍ୱ ଡ. ଗୋପାଳ ଚନ୍ଦ୍ର କରଙ୍କର ଆଜି (ଜାନୁଆରି ୧୯) ୮୦ ବର୍ଷ ବୟସରେ ଦେହାନ୍ତ ହୋଇଛି। ମାନସିକ ରୋଗ ନିଦାନ କ୍ଷେତ୍ରରେ ତାଙ୍କର ଅବଦାନ ଏବଂ ସମାଜସେବା ପ୍ରତି ତାଙ୍କର ସେବା ମନୋଭାବ ପାଇଁ ସେ ଜଣାଶୁଣା ଥିଲେ।
ଡକ୍ଟର କର ତାଙ୍କ କ୍ୟାରିୟରରେ ବିଭିନ୍ନ ସମ୍ମାନଜନକ ପଦବୀରେ ରହିଥିଲେ। ସେ ଡାକ୍ତରୀ ଶିକ୍ଷା ଓ ପ୍ରଶିକ୍ଷଣ ନିର୍ଦ୍ଦେଶକ, ଶ୍ରୀରାମ ଚନ୍ଦ୍ର ଭଞ୍ଜ ମେଡିକାଲ କଲେଜର ମାନସିକ ରୋଗ ବିଭାଗର ଅଧ୍ୟକ୍ଷ ତଥା ମୁଖ୍ୟ ଏବଂ ପ୍ରଥମ ଓଡ଼ିଆ ଭାବେ ଇଣ୍ଡିଆନ ମେଡିକାଲ ଆସୋସିଏସନର ସଭାପତି ଥିଲେ। ସମାଜସେବା ପାଇଁ ସେ ବିଷୁବ ପୁରସ୍କାର ସମେତ ଅନେକ ପୁରସ୍କାର ଓ ସମ୍ମାନ ପାଇଥିଲେ। ସେ ମେଡିସିନ କ୍ଷେତ୍ରରେ ଭାରତର ସର୍ବୋଚ୍ଚ ସମ୍ମାନ ଡି.ଏଲ.ଏନ ମୂର୍ତ୍ତିରାଓ ପୁରସ୍କାର ମଧ୍ୟ ପାଇଥିଲେ।
