ବୌଦ୍ଧ: ଆସନ୍ତା ୪ ତାରିଖରେ ହେବାକୁ ଯାଉଛି ଭୋଟ ଗଣତି । ଗଣତି ପାଇଁ ବୌଦ୍ଧ ଜିଲ୍ଲା ପ୍ରଶାସନ ପକ୍ଷରୁ ସମସ୍ତ ପ୍ରସ୍ତୁତି ଚୁଡ଼ାନ୍ତ କରାଯାଇଛି। ଜିଲାର ଦୁଇଟି ବିଧାନସଭା ଆସନ ପାଇଁ ପୃଥକ ଭାବରେ ଚାରି ଗୋଟି କକ୍ଷରେ ଭୋଟ ଗଣତି କରାଯିବ ବୋଲି ଜିଲ୍ଲାପାଳ ସୂଚନା ଦେଇଛନ୍ତି ।
ଆସନ୍ତା ୪ ତାରିଖ ଦିନ ଘୋଷଣା ହେବ ନିର୍ବାଚନର ଫଳାଫଳ। କଡା ସୁରକ୍ଷା ବଳୟ ମଧ୍ୟରେ ଷ୍ଟ୍ରଙ୍ଗ ରୁମରେ ରହିଛି ଇଭିଏମ । ଗଣତି ଦିନ ସକାଳ ୮ଟାରୁ ପ୍ରଥମେ ପୋଷ୍ଟାଲ ବାଲାଟ ଗଣତି ଆରମ୍ଭ ହେବ । ପରେ ସାଢେ ୮ଟାରୁ ଇଭିଏମ ମେସିନରେ ପଡ଼ିଥିବା ଭୋଟ ଗଣତି ଆରମ୍ଭ ହେବ । ବୌଦ୍ଧ ନିର୍ବାଚନ ମଣ୍ଡଳୀର ୧୯୬ ବୁଥ ପାଇଁ ୧୨ଟି ରାଉଣ୍ଡରେ ୧୭ଟି ଟେବୁଲ୍ ଓ କଣ୍ଟାମାଳ ନିର୍ବାଚନ ମଣ୍ଡଳୀର ୨୧୭ ବୁଥ ପାଇଁ ୧୪ଟି ରାଉଣ୍ଡରେ ୧୭ଟି ଟେବୁଲରେ ଇଭିଏମ ମେସିନର ଗଣତି ହେବ ବୋଲି ସୂଚନା ମିଳିଛି । ଏଥିପାଇଁ ବୌଦ୍ଧ ଜିଲ୍ଲା ପ୍ରଶାସନ ଓ ପୋଲିସ ପକ୍ଷରୁ ସମସ୍ତ ଅଞ୍ଚଳକୁ ସୁରକ୍ଷା ଦୃଷ୍ଟିରୁ ସିଲ ରଖାଯାଇ ଚବିଶ ଘଣ୍ଟା କଡା ସୁରକ୍ଷା ବଳୟ ମଧ୍ୟରେ ରଖାଯିବ। ଭୋଟ ଗଣନା ପ୍ରକ୍ରିୟା ଶାନ୍ତି ଶୃଙ୍ଖଳାର ସହିତ ସମାପନ କରିବା ପାଇଁ ଜିଲ୍ଲା ପ୍ରଶାସନ ପକ୍ଷରୁ ସମସ୍ତ ପ୍ରସ୍ତୁତି ଚୂଡ଼ାନ୍ତ କରାଯାଇଛି। ବୌଦ୍ଧ ଜିଲ୍ଲାର ଉଭୟ କଣ୍ଟାମାଳ ଓ ବୌଦ୍ଧ ନିର୍ବାଚନ ମଣ୍ଡଳୀରେ ଗତ ୨୦ ତାରିଖରେ ସାଧାରଣ ନିର୍ବାଚନ ଅନୁଷ୍ଠିତ ହୋଇଥିଲା।
