ନବରଙ୍ଗପୁର: ନବରଙ୍ଗପୁର ବିଦ୍ୟୁତ୍ ବିଭାଗ କର୍ମଚାରୀମାନେ ବିଦ୍ୟୁତ୍ ବିଭାଗ କାର୍ୟ୍ୟାଳୟ ସମ୍ମୁଖରେ ଅନିର୍ଦ୍ଦିଷ୍ଟ କାଳ ପାଇଁ ଧାରଣାରେ ବସିଛନ୍ତି। ନବରଙ୍ଗପୁର ଜିଲ୍ଲା ବିଦ୍ୟୁତ୍ ବିଭାଗର ବରିଷ୍ଠ କିରାଣୀ ବାଲାଜୀ ପଟ୍ଟନାୟକଙ୍କର କରୋନାରେ ସଂକ୍ରମିତ ହୋଇ ଚିକିତ୍ସାଧୀନ ଅବସ୍ଥାରେ ବିଶାଖାପାଟଣା ସ୍ଥିତ ଏକ ଘରୋଇ ହସ୍ପିଟାଲରେ ମୃତ୍ୟୁ ଘଟିବା ପରେ କର୍ମଚାରୀଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଇଥିଲା। ବିଦ୍ୟୁତ୍ ବିଭାଗର କର୍ମଚାରୀ ମୃତ ବାଲାଜୀଙ୍କ ସ୍ବାସ୍ଥ୍ୟ ଅବସ୍ଥା ଭଲ ନ ଥିଲେ ମଧ୍ୟ ତାଙ୍କୁ ଜବରଦସ୍ତି ବକେୟା ବିଦ୍ୟୁତ୍ ବିଲ ସଂଗ୍ରହ କରିବା ପାଇଁ ବିଦ୍ୟୁତ୍ ବିଭାଗ ନିର୍ବାହୀ ଯନ୍ତ୍ରୀ ସୁଶାନ୍ତ ସାହୁ ପଠାଇଥିଲେ। ଏହାପରେ ମୃତ କର୍ମଚାରୀଙ୍କ ଦେହ ବେଶି ଖରାପ ହୋଇଯାଇଥିଲା। ପରେ ତାଙ୍କୁ ବିଶାଖାପାଟଣାର ଏକ ଘରୋଇ ହସ୍ପିଟଲରେ ଭର୍ତି କରାଯାଇଥିଲା। ସେଠାରେ ସେ କରୋନାରେ ଆକ୍ରାନ୍ତ ହୋଇଥିବା ଜଣାପଡିଥିଲା। ସେଠାରେ ଚିକିତ୍ସାଧୀନ ଅବସ୍ଥାରେ ଆଜି ମୃତ୍ୟୁ ଘଟିଥିଲା। ମୃତ ବିଦ୍ୟୁତ୍ ବିଭାଗ କର୍ମଚାରୀ ବାଲାଜୀ ପଟ୍ଟନାୟକଙ୍କୁ କୋଭିଦ୍ ଯୋଦ୍ଧା ଭାବରେ ଘୋଷଣା କରି ପରିବାରକୁ ୫୦ ହଜାର ଟଙ୍କା ଆର୍ଥିକ ସହାୟତା ପ୍ରଦାନ କରିବା, ମୃତ କର୍ମଚାରୀଙ୍କ ପରିବାରର ଜଣକୁ ବିଦ୍ୟୁତ୍ ବିଭାଗରେ ଚାକିରୀ ପ୍ରଦାନ କରିବା ଓ ବିଦ୍ୟୁତ୍ ବିଭାଗ ନିର୍ବାହୀ ଯନ୍ତ୍ରୀଙ୍କ କାରଣରୁ କର୍ମଚାରୀଙ୍କ ମୃତ୍ୟୁ ହୋଇଥିବା କାରଣରୁ ତାଙ୍କ ବିରୁଦ୍ଧରେ କାର୍ୟ୍ୟାନୁଷ୍ଠାନ ଦାବୀ କରି ସଂଘ ଧାରଣାରେ ବସିଛି। ଜରୁରୀକାଳୀନ ସେବାକୁ ଛାଡ଼ିଦେଲେ ବିଭାଗର ଅନ୍ୟ କୌଣସି କାର୍ୟ୍ୟ କରିବ ନାହିଁ ଏବଂ ଦାବୀ ପୁରଣ ନହେବା ପର୍ୟ୍ୟନ୍ତ ଆନ୍ଦୋଳନ ଜାରି ରହିବ ବୋଲି ସଂଘ କହିଛି।
Comments are closed.