ଧାମରା: ଧାମରା ନିକଟସ୍ଥ କଇଥଖୋଲା ଠାରେ ଥିବା ଏକ ବିଦେଶୀ ମଦ ଦୋକାନ ସ୍ଥାନାନ୍ତରଣ କରିବାକୁ ଦାବି ଜୋର ଧରିଛି । ପ୍ରାପ୍ତ ଖବରରୁ ଜଣାଯାଇଛି ୨୦୨୧ ମସିହାରେ କଇଥଖୋଲା ବଜାର ଠାରେ ଏକ ବିଦେଶୀ ଠିପି ବନ୍ଦ ମଦ ଦୋକାନ ନୂତନ ଭାବେ ଖୋଲା ଯାଇଥିଲା । ଏହି ମଦ ଦୋକାନଟି କଇଥଖୋଲା ବଜାର ଠାରେ ଥିବା ୩ଟି ବିଦ୍ୟାଳୟର ସମ୍ମୁଖରେ ଖୋଲା ଯାଇଥିଲା । ଏହି ମଦ ଦୋକାନ ଖୋଲାଯିବା ପରେ ୩ଟି ବିଦ୍ୟାଳୟରେ ଛାତ୍ରଛାତ୍ରୀଙ୍କ ସଂଖ୍ୟା ଦିନକୁ ଦିନ କମିବାରେ ଲାଗିବା ସହ ଏହି ମଦ ଦୋକାନ ଆଗରେ ମଦ୍ୟପଙ୍କ ସଂଖ୍ୟା ବଢ଼ି ଚାଲିଛି । ଏହି ମଦ୍ୟପ ମାନଙ୍କ ଦୌରାତ୍ମ୍ୟରେ କୋମଳ ବୟସର ଛାତ୍ରଛାତ୍ରୀ ମାନେ ମଦ୍ୟପ ମାନଙ୍କ ଆକ୍ରୋଶର ଶିକାର ହେଉଛନ୍ତି । କିଛି ଛାତ୍ରଛାତ୍ରୀ ମାନଙ୍କ ଅଭିଭାବକ ନିଜର ପୁଅ ଝିଅ ମାନଙ୍କୁ ସେହି ବିଦ୍ୟାଳୟରୁ ଟିସି ଆଣି ଅନ୍ୟ ବିଦ୍ୟାଳୟରେ ଆଡମିଶନ ମଧ୍ୟ କରାଇବାକୁ ବାଧ୍ୟ ହୋଇଛନ୍ତି ।
ଫଳରେ କଇଥଖୋଲା ଅଂଚଳର ବୁଦ୍ଧିଜୀବୀ ମାନେ ଏହି ମଦ ଦୋକାନ ସ୍ଥାନାନ୍ତରଣ କରିବାକୁ ଭଦ୍ରକ ଜିଲ୍ଲାପାଳ ,ଅବକାରୀ ବିଭାଗ ଏସ ପି , କେନ୍ଦ୍ରାଂଚଳ ରାଜସ୍ୱ ଆୟୋଗ ଏବଂ ଅବକାରୀ ମନ୍ତ୍ରୀଙ୍କ ନିକଟରେ ଲିଖିତ ଦାବି ଜଣାଇଛନ୍ତି । ଏଥିସହ ଧାମରା ଅଂଚଳର ଏକ ବେସରକାରୀ ସଂସ୍ଥା ସେସଡୋ ମଧ୍ୟ ଏହି ଦୋକାନ ସ୍ଥାନାନ୍ତରଣ କରିବା ସହ ଅଂଚଳରେ ଶାନ୍ତିଶୃଙ୍ଖଳା ବଜାଇ ରଖିବାକୁ କର୍ତ୍ତୃପକ୍ଷଙ୍କ ନିକଟରେ ଦାବି କରିଛି । ଆଗାମୀ ୧ ମାସ ମଧ୍ୟରେ ଏହି ମଦ ଦୋକାନ ସ୍ଥାନାନ୍ତରଣ କରାନଗଲେ ଆନ୍ଦୋଳନାତ୍ମକ ପନ୍ଥା ଗ୍ରହଣ କରାଯିବା ସହ ପିଲା ମାନଙ୍କର ଅଭିଭାବକ ମାନେ ନିଜର କୁନି କୁନି ପିଲାମାନଙ୍କୁ ସେହି ବିଦ୍ୟାଳୟକୁ ଆଉ ଛାଡିବେ ନାହିଁ ବୋଲି ମଧ୍ୟ ଚେତାବନୀ ଦେଇଛନ୍ତି । ତାହା ସହ ଏହି ଘଟଣାରେ ଭଦ୍ରକ ଜିଲ୍ଲାପାଳ ଦୃଷ୍ଟି ଦେବାକୁ ସର୍ବସାଧାରଣରେ ଦାବି ହୋଇଛି ।
