ରେଙ୍ଗାଲି: ଖିଣ୍ତା ସରପଞ୍ଚ ନୀଳାବତୀ ଓରାମଙ୍କ ଅଭିଯୋଗ ଆଧାରରେ ଡାଇରେକ୍ଟର ଜେନେରାଲ୍ ଅଫ୍ ମାଇନ୍ସ ସେଫ୍ଟି(ଡିଜିଏମ୍ଏସ୍) ତଲାବିରା-୨ କୋଇଲା ପ୍ରକଳ୍ପ ଅଞ୍ଚଳ ପରିଦର୍ଶନରେ ଆସିଥିଲେ। ଡିଜିଏମ୍ଏସ୍ଙ୍କ ଖଣି ଅଞ୍ଚଳ ପରିଦର୍ଶନ ସମୟରେ ପ୍ରକଳ୍ପରେ ପ୍ରଭାବିତ ଅଞ୍ଚଳର ଲୋକ ପ୍ରତିନିଧି ଓ କ୍ଷତିଗ୍ରସ୍ତ ପରିବାର ତଥା ସ୍ବେଛାସେବୀ ଅନୁଷ୍ଠାନର ସଦସ୍ୟ ଉପସ୍ଥିତ ଥିଲେ। ସେମାନେ କମ୍ପାନୀ ଖଣି ନିୟମ ୧୯୫୨ର ସମସ୍ତ ଧାରାକୁ ଉଲଙ୍ଘନ କରି କିପରି ବିପଦ ସଂକୁଳ ପରିସ୍ଥିତିରେ କୋଇଲା ଉତ୍ତୋଳନ କରୁଛି ସେସବୁର ସରଜମିନ ତଥ୍ୟ ପ୍ରଦାନ କରିଥିଲେ।
୧୯୫୨ ଖଣି ନିୟମ ଅନୁସାରେ କୋଇଲାଖଣି ପ୍ରକଳ୍ପ ଅଞ୍ଚଳରେ କାମକରୁଥିବା କର୍ମଚାରୀମାନଙ୍କ ସାଧାରଣ ସୁରକ୍ଷା ବ୍ୟବସ୍ଥା, ପାନୀୟ ଜଳ, ଶୌଚାଳୟ, ଆଶୁ ଚିକିତ୍ସା, ପ୍ରାଥମିକ ଚିକିତ୍ସା ପାଇଁ କୌଣସି ପ୍ରକାର ସୁବିଧା ନ ଥାଇ ଖଣି କାର୍ଯ୍ୟ ପରିଚାଳିତ ହେଉଥିବା କଥା ନିର୍ଦଶକଙ୍କୁ ଅଭିଯୋଗ କରିଥିଲେ। ଖଣି ସୁରକ୍ଷା ନିର୍ଦ୍ଦେଶକ କମ୍ପାନୀ ଦ୍ବାରା ସୁରକ୍ଷା ବ୍ୟବସ୍ଥ ର ଅନୁଧ୍ୟାନ କରି ତଦନ୍ତର ଏକକିତା ନକଳ ସରପଞ୍ଚଙ୍କୁ ପ୍ରଦାନ କରିବେ ବୋଲି ପ୍ରତିଶ୍ରୁତି ଦେଇଥିଲେ।
ଏହା ବ୍ୟତୀତ ପ୍ରକଳ୍ପରେ କ୍ଷତିଗ୍ରସ୍ଥ ଓ ପ୍ରଭାବିତ ପରିବାରର ଯୋଗ୍ୟ ବ୍ୟକ୍ତିମାନଙ୍କୁ ପ୍ରକଳ୍ପରେ ନିଯୁକ୍ତି ପ୍ରଦାନ ନ କରି ବାହାର ଅଞ୍ଚଳର ଲୋକଙ୍କୁ ଖଣି କାର୍ଯ୍ୟରେ ନିୟୋଯିତ କରାଯାଉଥିବାର ଅଭିଯୋଗ କରିଥିଲେ। ଖଣି ନିର୍ଦେଶକ ଜନସାଧାରଣଙ୍କ ଅସୁବିଧା ବୁଝିବା ସହିତ ପରିଦର୍ଶନ ସମୟରେ ଉପସ୍ଥିତ ଥିବା କମ୍ପାନୀ କର୍ତ୍ତୁପକ୍ଷ ଏନ୍ଏଲ୍ସି କମ୍ପାନୀର ମୁଖ୍ୟ ସୁରେଶ ସୁମନ ଓ ଅଦାନୀ କମ୍ପାନୀର ପ୍ରଲଳ୍ପର ଉପ-ସଭାପତି ପ୍ରସନ୍ନ ପଣ୍ତାଙ୍କୁ ସବିଶେଷ ବିବରଣୀ ମାଗିଥିଲେ। ଲୋକଙ୍କ ଅଭିଯୋଗ ଅନୁସାରେ ତଦନ୍ତ ପ୍ରକ୍ରିୟା ଶେଷକରି ଏହାର ଶୀଘ୍ର ସମାଧାନ କରାଯିବ ବୋଲି ପ୍ରତିଶ୍ରୁତି ଦେଇଥିବାର ପ୍ରକାଶ।
