ଦେଓଗାଁ: ଜଣେ ମହିଳା ସରପଞ୍ଚ ଓ ତାଙ୍କ ସ୍ୱାମୀ ହୋଟେଲକୁ ଖାଇବାକୁ ଯାଇଥିବା ବେଳେ ଜଣେ ପୁରୁଷ ସରପଞ୍ଚ ତାଙ୍କୁ ଓ ତାଙ୍କ ସ୍ବାମୀକୁ ଦୁର୍ବ୍ୟବହାର କରିଥିବା ଅଭିଯୋଗ ହୋଇଛି। ଅନୁସୂଚିତ ଜାତି ମହିଳା ସରପଞ୍ଚ ଜଣଙ୍କୁ ଅଶ୍ଳୀଳ ଇଙ୍ଗିତ ସହ ଦୁର୍ବ୍ୟବହାର କରିବା ସହ ସରପଞ୍ଚଙ୍କ ସ୍ୱାମୀଙ୍କୁ ଜାତିଆଣା ଆକ୍ଷେପ କରିଥିଲେ। ଏହାପରେ ଗଣ୍ଡଗୋଳ କରିଥିଲେ। ଏନେଇ ସରପଞ୍ଚଙ୍କ ବିରୁଦ୍ଧରେ ମହିଳା ସରପଞ୍ଚ ଜଣକ ଦେଓଗାଁ ଥାନାରେ ଲିଖିତ ଅଭିଯୋଗ କରିଥିବା ଜଣାପଡ଼ିଛି।
ସୂଚନା ଅନୁସାରେ, ମଙ୍ଗଳବାର ଦିନ ପ୍ରାୟ ୨.୩୦ ସମୟରେ ମହିଳା ସରପଞ୍ଚ ଓ ତାଙ୍କ ସ୍ବାମୀ ଦେଓଗାଁର ଏକ ହୋଟେଲକୁ ଖାଇବାକୁ ଯାଇଥିଲେ। ଏହି ସମୟରେ ହୋଟେଲ ଭିତରକୁ ହାତୀସରା ସରପଞ୍ଚ କେଲୋ ଡାଙ୍ଗ ପହଞ୍ଚି ଖାଇବାକୁ ବସିଥିବା ସରପଞ୍ଚଙ୍କୁ ଅଶ୍ଳୀଳ ଇଙ୍ଗିତ କରି ଦୁର୍ବ୍ୟବହାର କରିବା ସହ ହତ୍ୟା ଧମକ ଦେଇଥିଲେ। ଏଥିସହ ତାଙ୍କ ସ୍ବାମୀଙ୍କୁ ମଧ୍ୟ ଜାତିଆଣା ଆକ୍ଷେପ କରିଥିଲେ। ଏନେଇ ମହିଳା ସରପଞ୍ଚ ଜଣକ ଦେଓଗାଁ ଥାନାରେ ଲିଖିତ ଅଭିଯୋଗ କରିଛନ୍ତି। ଅଭିଯୋଗ ପାଇବା ପରେ ପୁଲିସ ପ୍ରାଥମିକ ତଦନ୍ତ ଆରମ୍ଭ କରି କେସ୍ ନମ୍ବର -୧୩୩ରେ ଏକ ମାମଲା ରୁଜୁ କରିଥିବା ଜଣାପଡ଼ିଛି।
