ପିପିଲି: ପିପିଲି ଏନ୍ଏସିର ପୂର୍ବତନ ବିଜେପି ମଣ୍ଡଳ ସଭାପତି ଦେବାଶିଷ ଦିକ୍ଷିତ ଆଜି ପିପିଲି ବିଜ୍ଞାପିତ ଅଞ୍ଚଳ ପରିଷଦ(ଏନ୍ଏସି)ର ଅଧ୍ୟକ୍ଷ ଆସନ ପାଇଁ ସ୍ୱାଧୀନ ପ୍ରାର୍ଥୀ ଭାବେ ନିଜର ନାମାଙ୍କନ ଦାଖଲ କରିଛନ୍ତି। ସେ ନିଜର କର୍ମୀ ଓ ସମର୍ଥକଙ୍କ ସହ ମଢିଆଳି ସାହି ସ୍ଥିତ ମା’ ପୋଢେଇଶୁଣୀଙ୍କ ମନ୍ଦିରଠାରୁ ପଦଯାତ୍ରାରେ ବାହାରି ଏନ୍ଏସି କାର୍ଯ୍ୟାଳୟରେ ପହଞ୍ଚିଥିଲେ। ସେଠାରେ ନିର୍ବାଚନ ଅଧିକାରୀ ଦାୟିତ୍ୱରେ ଥିବା ଅତିରିକ୍ତ ତହସିଲଦାର ଜିତେନ୍ଦ୍ର କୁମାର ପଣ୍ଡାଙ୍କ ନିକଟରେ ସେ ନାମାଙ୍କନ ଦାଖଲ କରିଥିଲେ। ତାଙ୍କ ସହିତ ଅସନ୍ତୁଷ୍ଟ ବିଜେପିର ୩ଜଣ ମହିଳାନେତ୍ରୀ ମଧ୍ୟ କାଉନସିଲର ଆସନ ନିମନ୍ତେ ସ୍ୱାଧୀନ ପ୍ରାର୍ଥୀଭାବେ ନାମାଙ୍କନ ଦାଖଲ କରିଥିଲେ। ନାମାଙ୍କନ ଦାଖଲ ସମୟରେ ଅନ୍ୟମାନଙ୍କ ମଧ୍ୟରେ ପୂର୍ବତନ ଏନ୍ଏସି ମଣ୍ଡଳ ସଭାପତି ପ୍ରଦୀପ ବାରିକ, ପୂର୍ବତନ ସାଧାରଣ ସଂପାଦକ ଭବାନୀ ଶଙ୍କର ସାହୁ, ସୁରେଶ ମହାରଣା, ଯୁବନେତା ସଦାଶିବ ପରିଡା ପ୍ରମୁଖ ଉପସ୍ଥିତ ଥିଲେ। ପୌର ଅଧ୍ୟକ୍ଷ ଆସନ ନିମନ୍ତେ ଆଜି କେବଳ ଶ୍ରୀଦିକ୍ଷିତ ନାମାଙ୍କନ କରିଥିବା ବେଳେ କାଉନସିଲର ଆସନ ପାଇଁ କଂଗ୍ରେସରୁ ୨ଜଣଙ୍କୁ ମିଶାଇ ମୋଟ୍ ୧୦ଜଣ ନାମାଙ୍କନ ଦାଖଲ କରିଥିବା ସୂଚନା ମିଳିଛି। ଆସନ୍ତା କାଲି ଉଭୟ ବିଜେଡି ଓ ବିଜେପିର ଅଧ୍ୟକ୍ଷ ପ୍ରାର୍ଥୀଙ୍କ ସମେତ ବିଭିନ୍ନ ଦଳର କାଉନ୍ସିଲର ପ୍ରାର୍ଥୀମାନେ ନାମାଙ୍କନ ଦାଖଲ କରିବେ ବୋଲି ସୂଚନା ମିଳିଛି।
Comments are closed.