ଦେବଗଡ : ଦେବଗଡ ବନଖଣ୍ଡ ତଥା ଦେବଗଡ ବନାଂଚଳ ତିଲେଇବଣି ଫରେଷ୍ଟ ସେକ୍ସନ ଅନ୍ତର୍ଗତ ପ୍ରଭାଶୁଣି ସଂରକ୍ଷିତ ଜଙ୍ଗଲରୁ ଆଜି ଏକ ମାଈହାତୀର ମୃତଦେହ ଉଦ୍ଧାର କରାଯାଇଛି । ହାତୀଟିର ମୃତ୍ୟୁର ପ୍ରକୃତ କାରଣ ବର୍ତମାନ ପର୍ଯ୍ୟନ୍ତ ସ୍ପଷ୍ଟ ହୋଇନାହିଁ । ଅନ୍ୟପକ୍ଷରେ ଉକ୍ତ ମାଈହାତୀଟିର ବୟସ ପ୍ରାୟ ପ୍ରାୟ ୧୮ରୁ ୨୦ ବର୍ଷ ହୋଇଥିବା ବେଳେ ସେ ଗର୍ଭବତୀ ଥିଲା ଓ ଆଜି ସକାଳେ ସନ୍ତାନ ପ୍ରସବ ସମୟରେ ତା’ର ମୃତ୍ୟୁ ଘଟିଥିବା ଅନୁମାନ କରାଯାଉଛି ।
ସୂଚନା ପାଇ ତିଲେବଣି ଫରେଷ୍ଟର ଓ ଦେବଗଡ ବନାଂଚଳ ଅଧିକାରୀଙ୍କ ସମେତ ଦେବଗଡ ବନଖଣ୍ଡ ଅଧିକାରୀଣି ରଶ୍ମୀ ଜୀ, ଅତିରିକ୍ତ ବନ ସଂରକ୍ଷିକା ସ୍ୱାଧିନତା ସାହାଣି ଓ ଅତିରିକ୍ତ ବନ ସଂରକ୍ଷକ ଅରୁଣ କୁମାର ବେହେରା ଘଟଣା ସ୍ଥଳରେ ପହଂଚି ପରିସ୍ଥିତି ଅନୁଧ୍ୟାନ କରିବାସହ ଘଟନାର ତଦନ୍ତ ଚଳାଇଛନ୍ତି । ସେହିପରି ଇତିମଧ୍ୟରେ ପ୍ରାଣୀ ଚିକିତ୍ସକଙ୍କ ଦ୍ୱାରା ହାତୀଟିର ମୃତଦେହ ବ୍ୟବଚ୍ଛେଦ କରାଯାଇଥିବା ସୂଚନା ମିଳିଛି । ଏଠାରେ ସୂଚନା ଯୋଗ୍ୟ ଯେ, ଗତ ୮ ତାରିଖରେ ଦେବଗଡ ବନଖଣ୍ଡ ରିଆମାଳ ବନାଂଚଳ ରେଂଗାଳବେଡା ସେକ୍ସନ ଅନ୍ତର୍ଗତ କାଉଁଶିତଇଲା ଗ୍ରାମରେ ବିଦ୍ୟୂତ ସଂସ୍ପର୍ଷରେ ଏକ ଦନ୍ତାହାତୀର ମୃତ୍ୟୁ ଘଟିଥଲା । ସେହିପରି ଗତ ସେପ୍ଟେମ୍ବର ୧୨ ତାରିଖରେ ରିଆମାଳ ବନାଂଚଳ ପଳସମା ସେକ୍ସନ ଅନ୍ତର୍ଗତ ଚିରଗୁଣିକୁଦର ଗ୍ରାମରେ ଜୀବନ୍ତ ବିଦ୍ୟୁତ ତାର ସଂସ୍ପର୍ଷରେ ଅନ୍ୟ ଏକ ଦନ୍ତାହାତୀର ମୃତ୍ୟୁ ଘଟିଥିଲା ।
