ଦ୍ୱାରଶୁଣି: ମୟୂରଭଞ୍ଜ ଜିଲା ସାରସକଣା ଥାନା ଅନ୍ତର୍ଗତ ଜାମଶୋଳା ନିକଟ ଜଙ୍ଗଲରେ ବୁଧବାର ଜଣେ ଅଜଣା ବ୍ୟକ୍ତିଙ୍କ ମୃତ ଦେହ ଉଦ୍ଧାର କରାଯାଇଛି। ସୂଚନା ଅନୁସାରେ, କେହି ଦୁର୍ବୃତ୍ତ ଅଜଣା ବ୍ୟକ୍ତିଙ୍କୁ ମାରି ଫିଙ୍ଗି ଦେଇଥିବା ଜଣାପଡିଛି । ମୃତ ବ୍ୟକ୍ତିଙ୍କ ମୁହଁରେ କୌଣସି ଏକ ଧାରୁଆ(କୁରାଢ଼ୀ) ଅସ୍ତ୍ରର କଟା ଦାଗ ରହିଛି ଏବଂ ଦୁଇ ଆଖି ଭିତରକୁ ପଶି ବିକୃତ ହୋଇଯାଇଛି । ତେବେ ମୃତକଙ୍କୁ ଚିହ୍ନିବା ସମ୍ଭବ ହୋଇପାରୁନାହିଁ । ମୃତ ବ୍ୟକ୍ତିଙ୍କ ପାଖରେ ଏକ ମଦ ବୋତଲ ସହିତ ପ୍ଲାଷ୍ଟିକ ଗ୍ଲାସ, ପାଣି ବୋତଲ, ରୁଟି, ପିଆଜ, ଆଚାର ପଡିଥିବା ଦେଖିବାକୁ ମିଳିଛି । ଘଟଣାସ୍ଥଳକୁ ଦେଖିଲେ ବୁଝାପଡୁଛି ଉକ୍ତ ଜାଗାରେ ୩/୪ ଜଣରୁ ଉର୍ଦ୍ଧ୍ୱ ବ୍ୟକ୍ତି ଉପସ୍ଥିତିରେ ଏହା ଘଟିଛି ଏବଂ ମିଳିତ ଭାବେ ଅତି ନୃଶଂସ ଭାବେ ହତ୍ୟା କରି ଦୁର୍ବୃତ୍ତମାନେ ଖସି ପଳାଇଛନ୍ତି । ଝାରପୋଖରିଆ ପୁଲିସ ଖବର ପାଇ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରିଛି । ଏହାସହ ବାରିପଦାରୁ ସାଇଣ୍ଟିଫିକ ଟିମ୍ ଆସି ତଦନ୍ତ କରିବା ପରେ ଶବ ବ୍ୟବଚ୍ଛେଦ ପାଇଁ ପଠାଯିବ ବୋଲି ଆଇଆଇସି ଶରତ କୁମାର ମହାଳିକ ସୂଚନା ଦେଇଛନ୍ତି । ଏହାକୁ ନେଇ ୫୦/୧୯ରେ ଏକ ମାମଲା ରୁଜୁ ହୋଇଛି।
