ଆଠଗଡ: ଆଠଗଡ ବନଖଣ୍ଡରେ ହାତୀ ମୃତ୍ୟୁ ଥମିବାର ନାଁ ଧରୁନି। ଦୁଇଦିନ ପୂର୍ବରୁ ଅର୍ଥାତ ଗତ ଗୁରୁବାର ଆଠଗଡ ବନାଞ୍ଚଳ ଅନ୍ତର୍ଗତ କୁଲାଇଲୋ ନିକଟରେ ବିଦ୍ୟୁତ ଆଘାତରେ ଏକ ବିଶାଳ ଦନ୍ତାର ମୃତ୍ୟୁ ହୋଇଥିବାବେଳେ ରବିବାର ପୁଣି ଏକ ମାଈ ହାତୀର ଗଳିତ ମୃତଦେହ ଗୋଟିଏ ପରିତ୍ୟକ୍ତ କୂଅ ମଧ୍ୟରେ ପଡିଥିବା ଦେଖିବାକୁ ମିଳିଛି। ଏହି ଘଟଣାଟି କନ୍ଦରପୁର ବିଟ୍ ଅଞ୍ଚଳରେ ଘଟିଛି। ପ୍ରାୟ ୨/୩ମାସ ପୂର୍ବରୁ କନ୍ଦରପୁର ଗ୍ରାମ ପୂର୍ବରୁ କେନ୍ଦୁଟୋକଳି ଗ୍ରାମ ନିକଟ ମୁଖ୍ୟ ରାସ୍ତା କଡ ଚାଷ ଜମିରେ ଥିବା ଏକ ବାଡ ବିହୀନ ପାଣି ଭର୍ତ୍ତି ପରିତ୍ୟକ୍ତ କୂଅରେ ଉକ୍ତ ୪/୫ ବର୍ଷ ବୟସ୍କ ମାଈ ହାତୀଟି ପଡି ଯାଇଥିବା ଅନୁମାନ କରାଯାଉଛି । କୂଅରେ ପାଣି ଭର୍ତ୍ତି ଥିବାରୁ ହାତୀଟି ସେଥିରେ ବୁଡିରହିଥିଲା। ଏବେ କୂଅରୁ ପାଣି ଶୁଖି କମିଯିବା ପରେ ସେ ଅଞ୍ଚଳରେ ପ୍ରବଳ ଦୁର୍ଗନ୍ଧ ହୋଇଥିଲା । ସ୍ଥାନୀୟ କିଛି ଲୋକ ଗନ୍ଧ ବାରି ଉକ୍ତ କୂଅ ନିକଟକୁ ଯିବା ପରେ ସେଥିରେ ପାଣିକାଦୁଅ ମଧ୍ୟରେ ଏକ ହାତୀର ଗଳିତ ମୃତଦେହ ଭାସୁଥିବା ଦେଖି ବନବିଭାଗକୁ ସୂଚନା ଦେଇଥିଲେ । ସୂଚନା ପାଇ ଆଠଗଡ ଡିଏଫଓ ଡାକ୍ତର ଯଜ୍ଞଦତ୍ତ ପତିଙ୍କ ସମେତ ସଦର ରେଞ୍ଜର ରବିନ୍ଦ୍ର କୁମାର ନାୟକ ଏବଂ ବନ ବିଭାଗର ଅନ୍ୟ ଅଧିକାରୀ ଓ କର୍ମଚାରୀ ପହଞ୍ଚି ପ୍ରାଥମିକ ଅନୁସନ୍ଧାନ କରିଥିଲେ। ପରେ ଅନୁଗୁଳରୁ ଆଞ୍ଚଳିକ ମୁଖ୍ୟ ବନ ସଂରକ୍ଷକ ସୁଧାଂଶୁ ଶେଖର ଖୋରା ଓ ଭୁବନେଶ୍ଵରରୁ ବନବିଭାଗର ସ୍ଵତନ୍ତ୍ର ଟାସ୍କ ଫୋର୍ସର ଯୁଗ୍ମ ବନ ସଂରକ୍ଷକ ଅରବିନ୍ଦ ମିଶ୍ର ପ୍ରମୁଖ ଘଟଣାସ୍ଥଳରେ ପହଞ୍ଚି ହାତୀ ମୃତ୍ୟୁ ଘଟଣାର ଅନୁଧ୍ୟାନ କରିଥିଲେ । ଏକ ଜେସିବି ସାହାଯ୍ୟରେ ହାତୀର ଗଳିତ ମୃତଦେହକୁ କୂଅ ମଧ୍ୟରୁ ବାହାର କରିବା ପରେ ବ୍ୟବଚ୍ଛେଦ ପାଇଁ ପଦକ୍ଷେପ ନିଆଯାଇଥିଲା । ବ୍ଲକ ପ୍ରାଣୀ ଚିକିତ୍ସା ଅଧିକାରୀ ଡାକ୍ତର ଅନ୍ତର୍ଯାମୀ ବାରିକ ମୃତ ହାତୀର ବ୍ୟବଚ୍ଛେଦ କରିଥିଲେ। ବ୍ୟବଚ୍ଛେଦ ପରେ ମୃତ ହାତୀ ଶରୀରର କିଛି ଅଂଶ ଅଧିକ ପରୀକ୍ଷା ନିରୀକ୍ଷା ପାଇଁ ଓୟୁଏଟିର ପ୍ରାଣୀବିଜ୍ଞାନ ବିଭାଗକୁ ପଠାଯାଇଛି । ବ୍ୟବଚ୍ଛେଦ ରିପୋର୍ଟ ମିଳିବା ପରେ ମାଈ ହାତୀଟିର ବୟସ, କେତେ ଦିନ ହେବ ମୃତ୍ୟ ହୋଇଛି ଓ ମୃତ୍ୟୁର କାରଣ ସ୍ପଷ୍ଟ ହେବ ବୋଲି ବନଖଣ୍ଡ ଅଧିକାରୀ କହିଛନ୍ତି । ହାତୀଟି କେବେ ଏବଂ କେଉଁ ପରିସ୍ଥିତିରେ ଉକ୍ତ କୂଅରେ ପଡିଲା ଏବଂ ବନ ବିଭାଗ କ୍ଷେତ୍ର କର୍ମଚାରୀ ଓ ହାତୀ ଜଗୁଆଳୀ କିପରି ଏ କଥା ଏତେ ଦିନ ପର୍ଯ୍ୟନ୍ତ ଜାଣିପାରିଲେ ନାହିଁ ତାହା ତଦନ୍ତ ପରିସରଭୁକ୍ତ ଅଛି ବୋଲି ଡିଏଫଓ ପ୍ରକାଶ କରିଛନ୍ତି । ତଦନ୍ତ ପରେ କାର୍ଯ୍ୟରେ ଅବହେଳା ପ୍ରଦର୍ଶନର ପ୍ରମାଣ ମିଳିଲେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଡିଏଫଓ କହିଛନ୍ତି।
Comments are closed.