ରେଙ୍ଗାଲିକ୍ୟାମ୍ପ: ଅତାବିରା ଥାନା ଗୋଡଭଗା ଫାଣ୍ଡି ଅନ୍ତର୍ଗତ କୁମେଲସିଂହା ଗ୍ରାମରେ ଏକ ପ୍ରେମୀ ଯୁଗଳଙ୍କ ଝୁଲନ୍ତା ମୃତଦେହ ଗ୍ରାମ ନିକଟ ପୋଟଳବାରିରୁ ଶୁକ୍ରବାର ଉଦ୍ଧାର ହୋଇଛି। ଖବର ପାଇ ଅତାବିରା ଥାନା ଅଧିକାରୀ ପ୍ରକାଶ କର୍ଣ୍ଣ ଓ ଗୋଡଭଗା ଫାଣ୍ଡି ଅଧିକାରୀ ଗଣେଶ ବାରିକ୍ ଘଟଣା ସ୍ଥଳରେ ପହଞ୍ଚି ମାଜିଷ୍ଟ୍ରେଟ କେ. ରିଚୀ କୁମାରଙ୍କ ଉପସ୍ଥିତିରେ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ବରଗଡ଼ ପଠାଇଛନ୍ତି। ମୃତକ ମାନେ ହେଲେ କୁମେଲସିଂହା ଗ୍ରାମ ଶବର ପଡାର ହିମାଂଶୁ ଭୂଏ (୪୦) ଓ ବଗର୍ତ୍ତି ଟିକ୍ରାର ପିଙ୍କି ବଗର୍ତ୍ତୀ(୩୪)।
ଘଟଣାରୁ ପ୍ରକାଶ ଯେ, ଉଭୟ ପ୍ରେମୀ ଯୁଗଳ ବିବାହିତ ଥିଲେ । ଏହା ସତ୍ୱେ ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ଗଢିଉଠିଥିଲା । ଏ ସମ୍ପର୍କରେ ଉଭୟଙ୍କ ପରିବାର ଲୋକେ ଜାଣିପାରି ଏଥରୁ ନିବୃତ୍ତ ରହିବା ପାଇଁ ଅନେକ ଥର ଉଭୟଙ୍କୁ ମନା ମଧ୍ୟ କରିଆସୁଥିଲେ । ହେଲେ ସେମାନେ ପରିବାର ଲୋକଙ୍କ କଥାକୁ ଗୁରୁତ୍ୱ ନ ଦେଇ ସମ୍ପର୍କରେ ରଖି ଆସୁଥିଲେ । ଗତ ୨୭ ତାରିଖରୁ ସେମାନେ ନିଖୋଜ ଥିଲେ। ୩୧ ତାରିଖ ସକାଳେ ଏକ ଗଛରେ ଲୁଙ୍ଗି ଓ ଓଢଣୀ ଲଗାଇ ଝୁଲନ୍ତା ଅବସ୍ଥାରେ ଉଭୟଙ୍କୁ ଗ୍ରାମବାସୀ ଦେଖିବାକୁ ପାଇ ଗୋଡଭଗା ପୁଲିସକୁ ସୂଚନା ଦେଇଥିଲେ। ଏ ନେଇ ପୁଲିସ ଏକ ଅପମୃତ୍ୟୁ ମାମଲା ରୁଜୁ କରି ଘଟଣା ସମ୍ପର୍କରେ ଅଧିକ ତଦନ୍ତ ଜାରି ରଖିଛି। ମୃତ ହିମାଂଶୁର ୧୮ ଓ ୧୯ ବର୍ଷର ୨ଟି ପୁଅ ଓ ସ୍ତ୍ରୀ ରହିଥିବା ବେଳେ ମୃତ ପିଙ୍କିର ୧୫ ବର୍ଷ, ୧୨ ବର୍ଷ, ୬ ବର୍ଷର ୩ଟି ଝିଅ ଓ ଗୋଟିଏ ୪ ବର୍ଷର ପୁଅ ସହ ତାର ସ୍ୱାମୀ ରହିଛନ୍ତି।
