କାଜୁ ଜଙ୍ଗଲରୁ ବିଲ୍ଡରଙ୍କ ମୃତଦେହ ଉଦ୍ଧାର, ହତ୍ୟା ସନ୍ଦେହ

ସମାଜ ଡିଜିଟାଲ ଡେସ୍କ: ସୁନ୍ଦରପଦା ଅନ୍ତର୍ଗତ ପଧାନସାହି ଖେଳପଡ଼ିଆ ନିକଟ କାଜୁ ଜଙ୍ଗଲରୁ ଜଣେ ବିଲ୍ଡରଙ୍କ ମୃତଦେହ ଉଦ୍ଧାର ହୋଇଛି। ମୃତକ ଜଣକ ଭୁବନେଶ୍ଵର ୟୁନିଟ-୬ ଅଞ୍ଚଳର ଚିନୁ ବିଶ୍ଵାଳ ବୋଲି ସୂଚନା ମିଳିଛି। ପାରିପାର୍ଶ୍ବିକ ସ୍ଥିତିରୁ ଚିନୁଙ୍କୁ ହତ୍ୟା କରି ଫିଙ୍ଗି ଦିଆଯାଇଥିବା ସ୍ଥାନୀୟ ଲୋକେ ସନ୍ଦେହ କରୁଛନ୍ତି। ତେବେ ଏହା ଆତ୍ମହତ୍ୟା ନା ହତ୍ୟା ତାହାର ଖୋଳତାଡ଼ କରୁଛି ପୁଲିସ।

କାଜୁ ଜଙ୍ଗଲରେ ମୃତଦେହ ପଡ଼ିଥିବା ନେଇ କିଛି ଲୋକ ଦେଖିବା ପରେ ପୁଲିସକୁ ଖବର ଦେଇଥିଲେ। ମୃତଦେହଠାରୁ କିଛି ଦୂରରେ ଏକ ସ୍କୁଟି ପଡ଼ିଥିଲା। ପୁଲିସ ପହଞ୍ଚି ମୃତଦେହ ଜବତ କରି ତଦନ୍ତ ଚଳାଇଛି। ଚିନୁ ଭୁବନେଶ୍ଵର ଏବଂ ଏହାର ଆଖପାଖ ଅଞ୍ଚଳରେ ଜମି ବ୍ୟବସାୟ କରୁଥିଲେ। ଚିନୁଙ୍କ ମୃତଦେହ କ୍ୟାପିଟାଲ ହସ୍ପିଟାଲରେ ପହଞ୍ଚିବା ପରେ ଉତ୍ତେଜନା ପ୍ରକାଶ ପାଇଥିଲା।