ମୁମ୍ବଇ : ମହାକାଶଚାରୀ ରାକେଶ ଶର୍ମାଙ୍କ ବାୟୋପିକ ‘ସାଲ୍ୟୁଟ୍’ରେ ଶାହାରୁଖଙ୍କ ବିପକ୍ଷରେ ନାୟିକାଙ୍କ ସନ୍ଧାନ ଜାରି ରହିଛି। ତାଜାଖବର ଅନୁସାରେ, ଦଙ୍ଗଲ ଗାର୍ଲ ଫାତିମା ସନା ଶେଖଙ୍କୁ ଏହି ଚଳଚ୍ଚିତ୍ରର ନାୟିକା ଭାବେ ମନୋନୀତ କରାଯାଇଛି। ଚଳଚ୍ଚିତ୍ରର ସୁଟିଂ ଆସନ୍ତା ଫେବୃଆରୀ ମାସରୁ ଆରମ୍ଭ ହେବ।
ସୂଚନା ଅନୁସାରେ, ଚଳଚ୍ଚିତ୍ର ନିର୍ମାତାଙ୍କୁ ଫାତିମାଙ୍କ କାମ ବହୁତ ଭଲ ଲାଗିଛି ଓ ତାଙ୍କୁ ଶାହାରୁଖଙ୍କ ବିପକ୍ଷରେ ନାୟିକା ଭାବେ ନେବା ପାଇଁ ବିଚାର କରାଯାଇଛି। ଏହି ଭୂମିକା ପାଇଁ ବହୁ ଅଭିନେତ୍ରୀଙ୍କ ନାମ ଶୁଣିବାକୁ ମିଳୁଥିବା ବେଳେ ଫାତିମା ଏଥିପାଇଁ ପ୍ରକୃତରେ ଉପଯୁକ୍ତ ବୋଲି କୁହାଯାଉଛି।
ନିକଟରେ ଏକ ସାକ୍ଷାତକାରରେ ଫାତିମା କହିଥିଲେ ଯେ, ସେ ସୁପରଷ୍ଟାର ଶାହାରୁଖ ଖାନଙ୍କ ସହ କାମ କରିବାକୁ ଚାହୁଁଛନ୍ତି। ସେ ଏହା ମଧ୍ୟ କହିଥିଲେ ଯେ, ଯେତେବେଳେ ଶାହାରୁଖ ତାଙ୍କ ଆଖପାଖରେ ଥାଆନ୍ତି ସେତେବେଳେ ସେ ଭୟଭୀତ ହୋଇଯାଆନ୍ତି। ସେ ଶାହାରୁଖଙ୍କର ଜଣେ ବଡ଼ ପ୍ରଶଂସକ ଓ ବହୁତ ଦିନ ଧରି ତାଙ୍କ ସହ କାମ କରିବାକୁ ଆଗ୍ରହୀ। ଫାତିମାଙ୍କ ପୂର୍ବ ଚଳଚ୍ଚିତ୍ର ଥିଲା ‘ଠଗ୍ସ ଅଫ୍ ହିନ୍ଦୁସ୍ତାନ୍’, ଯେଉଁଥିରେ ତାଙ୍କୁ ଅମିର ଖାନଙ୍କ ବିପକ୍ଷରେ ଦେଖିବାକୁ ମିଳିଥିଲା। ଚଳଚ୍ଚିତ୍ରରେ ତାଙ୍କ ଅଭିନୟକୁ ଦର୍ଶକ ଖୁବ୍ ପସନ୍ଦ ମଧ୍ୟ କରିଥିଲେ।
