ମୋହନା: ଗଜପତି ଜିଲ୍ଲା ମୋହନା ବ୍ଲକରେ ଶାନ୍ତି ଶୃଙ୍ଖଳାର ସହ ପ୍ରଥମ ପର୍ଯ୍ୟାୟ ନିର୍ବାଚନ ସରିଛି । ଜିଲ୍ଲାପାଳ ଲିଙ୍ଗରାଜ ପଣ୍ଡା ଓ ଏସପି ଜୟରାମ ଶତପଥୀଙ୍କ ନିର୍ଦ୍ଦେଶକ୍ରମେ ପୁଲିସ ପ୍ରଶାସନ କର୍ତ୍ତବ୍ୟ ନିଷ୍ଠ ଭାବେ ନିଜର ଦାୟୀତ୍ୱ ତୁଲାଇଥିଲେ। କିନ୍ତୁ ଭୋଟ ବାକ୍ସ ଗଣତି କେନ୍ଦ୍ର(ଷ୍ଟ୍ରଙ୍ଗ ରୁମ)ରେ ପହଞ୍ଚିବା ଦିନଠୁ ବିଜେପି ଓ କଂଗ୍ରେସ ପ୍ରାର୍ଥୀଙ୍କ ନିଦ ହଜିଯାଇଛି । ଦିନକୁ ଦିନ ବିଜେଡିର ଟାଣୁଆ ନେତାଙ୍କ ମୋହନା ଗସ୍ତ, ଷଢ଼ଯନ୍ତ୍ର ଓ ପ୍ରରୋଚନାରେ ପଡି ଜିଲ୍ଲା ପ୍ରଶାସନ ବିଭିନ୍ନ ପ୍ରକାର ଉପାୟ ଅବଲମ୍ବନ କରୁଛି। ଏପରିକି ବିଜେଡି ଯେପରି ହେଲେ କଳ, ବଳ ଓ କୌଶଳ ଖଟାଇ ବ୍ଳକର ଅଡବା, ମୋହନା, ଚନ୍ଦ୍ରଗିରି ୩ଟି ଜୋନକୁ ହାତେଇବା ପାଇଁ ପ୍ରୟାସ ଜାରି ରଖିଥିବା କଂଗ୍ରେସର ଜିଲ୍ଲା ପରିଷଦ ପ୍ରାର୍ଥୀ ରୀନା ପ୍ରଧାନ, ରାଜୀବ ମଳିକ, ଗୌରୀଶଙ୍କର ପ୍ରଧାନୀ ଓ ବିଜେପିର ସସ୍ମିତା ମଳିକ, ବିଶ୍ଵନାଥ ବିଷୋୟୀ ରତ୍ନ ଓ ବାସ୍ତି ମଳିକ ଅଭିଯୋଗ କରିଛନ୍ତି। ଗଣତି ଦିନ କିଛି ବିଜେଡିର ବିଶୃଙ୍ଖଳିତ କର୍ମୀମାନଙ୍କ ଦ୍ୱାରା ବଡ ଧରଣର ଅଶାନ୍ତି ସୃଷ୍ଟି କରିବା ପାଇଁ ପ୍ରୟାସ ଜାରି ରହିଥିବା ମଧ୍ୟ ଅଭିଯୋଗ ହୋଇଛି।ତେଣୁ ଯେଭଳି ଶାନ୍ତିପୂର୍ଣ୍ଣ ଭାବେ ନିର୍ବାଚନ କମିଶନରଙ୍କ ନୀତି ନିୟମ ପ୍ରକାରେ ଓ କଡ଼ା ସୁରକ୍ଷା ମଧ୍ୟରେ ଭୋଟ ଗଣତି ହେବ ଏବଂ ଏଜେଣ୍ଟମାନଙ୍କୁ ସୁରକ୍ଷା ଯୋଗାଇଦେବା ଉଦ୍ଦେଶ୍ୟରେ ଏକ ଦାବି ପତ୍ର ଦୁଇ ରାଜନୈତିକ ଦଳର ପ୍ରାର୍ଥୀ ଓ ସମର୍ଥକ ସ୍ଥାନୀୟ ଗୋଷ୍ଠୀ ଉନ୍ନୟନ ଅଧିକାରୀ ତପସ୍ଵିନୀ ହାଁସଦାଙ୍କୁ ପ୍ରଦାନ କରିଛନ୍ତି। ବିଜେପି ଓ କଂଗ୍ରେସ ଜିଲ୍ଲାପାଳ ଓ ଏସପିଙ୍କୁ ଏହି ଖବର ବିଷୟରେ ମଧ୍ୟ ଅବଗତ କରାଇ କଡା ସୁରକ୍ଷା ମଧ୍ୟରେ ଭୋଟ ଗଣତି ଓ ଏଜେଣ୍ଟମାନଙ୍କୁ ସୁରକ୍ଷା ଯୋଗାଇ ଦେବା ପାଇଁ ଅନୁରୋଧ କରିଛନ୍ତି।
Popular Categories
Previous article
Next article