ଭୁବନେଶ୍ବର: ‘ଜୱାଦ’ ବାତ୍ୟା ରାଜ୍ୟର କୃଷକଙ୍କ ବର୍ଷକର ଆହାର ଛଡ଼ାଇ ନେଇଛି। ନିଜର ଫସଲ ହରାଇ ଚାଷୀ ଏବେ ସରକାରୀ ସହାୟତା ପାଇବାକୁ ଡହଳବିକଳ ହେଉଥିବାବେଳେ କ୍ଷୟକ୍ଷତି ଆକଳନ କରିବାକୁ ଆସିଥିବା କେନ୍ଦ୍ରୀୟ ଦଳ ମଧ୍ୟ ତାହା ଅନୁଭବ କରିଛି। ତେବେ ପ୍ରାକୃତିକ ବିପର୍ଯ୍ୟୟରେ ଫସଲ ନଷ୍ଟ ପାଇଁ ପ୍ରଚଳିତ ବ୍ୟବସ୍ଥାରେ ସରକାରୀ ସହାୟତା ଯଥେଷ୍ଟ ହେଉନାହିଁ। ଏଥିପାଇଁ ରାଜ୍ୟ ବିପର୍ଯ୍ୟୟ ରିଲିଫ ପାଣ୍ଠି ନିୟମ ଓ ରିଲିଫ୍ କୋଡ୍ ସଂଶୋଧନ ଲାଗି କେନ୍ଦ୍ରୀୟ ଦଳ କେନ୍ଦ୍ର ସରକାରଙ୍କୁ ସୁପାରିସ କରିବ ବୋଲି ଜଣାପଡ଼ିଛି। ଏହାପୂର୍ବରୁ କେନ୍ଦ୍ରକୁ ରାଜ୍ୟ ସରକାର ବହୁବାର ଚିଠି ଲେଖି ନିୟମରେ ପରିବର୍ତ୍ତନ କରିବାକୁ ଅନୁରୋଧ କରିଆସୁଛନ୍ତି।
ରାଜ୍ୟ ବିପର୍ଯ୍ୟୟ ରିଲିଫ ପାଣ୍ଠି ନିୟମାନୁଯାୟୀ ‘ଜୱାଦ’ ଜନିତ ଫସଲ କ୍ଷତି ସହାୟତା ରାଶି ଯଥେଷ୍ଟ ହେବନାହିଁ। ପ୍ରାକୃତିକ ଦୁର୍ବିପାକରେ ଫସଲ ନଷ୍ଟ ହେଲେ ସହାୟତା ବାବଦରେ ଜଳସେଚିତ ଜମି ପାଇଁ ହେକ୍ଟର ପିଛା ୧୩ ହଜାର ୫୦୦ ଓ ଅଣଜଳସେଚିତ ଜମି ପାଇଁ ୬ ହଜାର ୮୦୦ ଟଙ୍କା ମିଳୁଛି। ଏବେ କେନ୍ଦ୍ରୀୟ ଦଳ କ’ଣ ସୁପାରିସ କରୁଛି ତାକୁ ରାଜ୍ୟ ସରକାର ଅପେକ୍ଷା କରିଛନ୍ତି। ବିହନ, ସାର ଓ ମଜୁରୀ ସହିତ ଫସଲ ଉତ୍ପାଦନ ଖର୍ଚ୍ଚ ବଢ଼ି ଚାଲିଛି। ଏପରିସ୍ଥଳେ ନିୟମ ସଂଶୋଧନ ହେଲେ ପ୍ରାକୃତିକ ବିପର୍ଯ୍ୟୟ ପ୍ରପୀଡ଼ିତ ଓଡ଼ିଶାର ଚାଷୀ ଉପକୃତ ହେବେ।
‘ଜୱାଦ’ ପ୍ରଭାବିତ ଗଞ୍ଜାମ, ପୁରୀ, ଜଗତସିଂହପୁର, ଯାଜପୁର, କଟକ ଓ କେନ୍ଦ୍ରାପଡ଼ାରେ କ୍ଷୟକ୍ଷତି ଆକଳନ କରିବାକୁ ରବିବାର ସ୍ବରାଷ୍ଟ୍ର ମନ୍ତ୍ରାଳୟର ଯୁଗ୍ମ ସଚିବ ସୌରଭ ରାୟଙ୍କ ନେତୃତ୍ବାଧୀନ ଏକ ୬ ଜଣିଆ ଦଳ ଓଡ଼ିଶା ଗସ୍ତରେ ଆସିଛି।
