ଆଡିଲେଡ୍ : ଆଶା ଅନୁସାରେ ଏଠାରେ ଶୁକ୍ରବାର ସମାପ୍ତ ହୋଇଥିବା ପ୍ରଥମ ଟେଷ୍ଟମ୍ୟାଚ୍କୁ ଘରୋଇ ଅଷ୍ଟ୍ରେଲିଆ ସହଜରେ ଜିତିନେଇଛି। ୱେଷ୍ଟଇଣ୍ଡିଜ୍କୁ ୧୦ ୱିକେଟ୍ରେ ହରାଇ ୨ ମ୍ୟାଚ୍ ବିଶିଷ୍ଟ ଟେଷ୍ଟ ଶୃଙ୍ଖଳାରେ ଅପରାଜେୟ ୧-୦ ଲିଡ୍ ନେଇପାରିଛି ଅଷ୍ଟ୍ରେଲିଆ। ପ୍ରଥମ ଇନିଂସରେ ୯୫ ରନ୍ରେ ପଛରେ ରହିବା ପରେ ୨ୟ ଇନିଂସରେ ୱେଷ୍ଟଇଣ୍ଡିଜ୍ ଦୟନୀୟ ବ୍ୟାଟିଂକରି ଶୁକ୍ରବାର ୩ୟ ଦିନରେ ୧୨୦ ରନ୍କରି ଅଲ୍ଆଉଟ୍ ହୋଇ ଯାଇଥିଲା। ଫଳରେ ଅଷ୍ଟ୍ରେଲିଆକୁ ୨ୟ ଇନିଂସରେ ମାତ୍ର ୨୬ ରନ୍ର ବିଜୟଲକ୍ଷ୍ୟ ମିଳିଥିଲା। କୌଣସି ୱିକେଟ୍ ନ ହରାଇ ଅଷ୍ଟ୍ରେଲିଆ ଏହା ହାସଲ କରି ନେଇଥିଲା।
୨ୟ ଦିନରେ ୱେଷ୍ଟଇଣ୍ଡିଜ୍ ୨ୟ ଇନିଂସରେ ୭୩ ରନ୍କରି ୬ଟି ୱିକେଟ ହରାଇଥିଲା। ଏହା ଇନିଂସ ପରାଜୟ ଏଡ଼ାଇ ପାରିଥିଲା ସତ; ପରାଜୟ ଏଡ଼ାଇ ପାରିନଥିଲା। ଜୋସୁଆ ଡା ସିଲ୍ଭା ୧୮ ଓ ଆଲ୍ଜାରି ଜୋସେଫ୍ ୧୬ ରନ୍ କରିଥିଲେ। ଶେଷ ୱିକେଟରେ ୨୪ ରନ୍ ହୋଇଥିଲା। ଟେଷ୍ଟ ପଦାର୍ପଣ କରିଥିବା ସାମର ଜୋସେଫ୍ ୩ଟି ଚୌକା ସହ ୧୫ ରନ୍ କରିଥିବା ବେଳେ କିମାର ରୋଚ୍ ୧୧ ରନ୍କରି ଅପରାଜିତ ରହିଥିଲେ।
୨୬ ରନ୍ ବିଜୟଲକ୍ଷ୍ୟର ପିଛା କରିଥିବା ଅଷ୍ଟ୍ରେଲିଆର ଓପ୍ନର ଉସ୍ମାନ ଖାୱାଜା ୯ ରନ୍କରି ରିଟାୟର୍ଡ ହର୍ଟ ହୋଇଥିଲେ। ଷ୍ଟିଭେନ୍ ସ୍ମିଥ୍ ୧୨ ଓ ମାର୍ନସ ଲାବୁସେନ୍ ୧ ରନ୍କରି ଅପରାଜିତ ରହିଥିଲେ। ଉଭୟ ଇନିଂସରେ ୫ଟି ଲେଖାଏଁ; ଏହିପରି ମ୍ୟାଚ୍ରେ ମୋଟ ୧୦ଟି ୱିକେଟ୍ ନେଇଥିବା ଜୋସ୍ ହାଜେଲ୍ଉଡ୍ ପ୍ଲେୟର ଅଫ୍ ଦି ମ୍ୟାଚ୍ ହୋଇଥିଲେ।
