ଭୁବନେଶ୍ବର : ପାର୍ବଣ ଋତୁ ସମୟରେ ଦେଶରେ କ୍ରେଡିଟ୍ କାର୍ଡ ଖର୍ଚ୍ଚ ୨ ଲକ୍ଷ ପାର୍ କରିଛି । ଭାରତୀୟ ରିଜର୍ଭ ବ୍ୟାଙ୍କର ରିପୋର୍ଟ ଅନୁସାରେ ଅକ୍ଟୋବରରେ କ୍ରେଡିଟ୍ କାର୍ଡ ଖର୍ଚ୍ଚ ୨.୦୨ ଲକ୍ଷ କୋଟି ଟଙ୍କା ପର୍ଯ୍ୟନ୍ତ ପହଞ୍ଚିଯାଇଛି ଯାହା ଗତ ବର୍ଷ ତୁଳନାରେ ୧୩ ପ୍ରତିଶତ ଅଧିକ । ତଥ୍ୟ ଅନୁସାରେ ସିଷ୍ଟମରେ ବକେୟା କ୍ରେଡିଟ କାର୍ଡ ୧୨.୮୫ ପ୍ରତିଶତ ବୃଦ୍ଧି ପାଇ ୧୦୬.୮୮ ମିଲିୟନ୍ ହୋଇଯାଇଛି ଯାହା ସେପ୍ଟେମ୍ବରରୁ ୦.୭୪ ପ୍ରତିଶତ ଅଧିକ ।
ଏଚଡିଏଫସି ବ୍ୟାଙ୍କ ୨,୪୧,୧୧୯ଟି କ୍ରେଡିଟ୍ କାର୍ଡ ଜାରି କରି ଚାର୍ଟରେ ସବୁଠାରୁ ଆଗରେ ରହିଛି । ଏହା ପରେ ଷ୍ଟେଟବ୍ୟାଙ୍କ ୨,୨୦,୨୬୫ଟି କାର୍ଡ ଓ ଆଇସିଆଇସିଆଇ ବ୍ୟାଙ୍କ ୧,୩୮,୫୪୧ଟି କାର୍ଡ ଜାରି କରିଛି । ଇତି ମଧ୍ୟରେ ରିଜର୍ଭ ବ୍ୟାଙ୍କର ତଥ୍ୟ ଅନୁସାରେ ୟୁପିଆଇ ଆଧାରିତ ଡିଜିଟାଲ ପୈଠ ବୃଦ୍ଧି କାରଣରୁ ଡେବିଟ୍ କାର୍ଡ ଆଧାରିତ ନେଣଦେଣ ଅଗଷ୍ଟରେ ୪୩ ହଜାର ୩୫୦ କୋଟି ଟଙ୍କାରୁ ପ୍ରାୟ ୮ ପ୍ରତିଶତ ହ୍ରାସ ପାଇ ୩୯ ହଜାର ୯୨୦ କୋଟି ଟଙ୍କା ହୋଇଛି ।
ଅନ୍ୟପଟେ ଦେଶରେ କ୍ରେଡିଟ୍ କାର୍ଡ ନେଣଦେଣ ବଢିଛି । ସେପ୍ଟେମ୍ବର ମାସରେ ପ୍ରାୟ ୫ ପ୍ରତିଶତ ବୃଦ୍ଧି ଦେଖିବାକୁ ମିଳିଛି । ଅଗଷ୍ଟରେ ୧.୬୮ ଲକ୍ଷ କୋଟି ଟଙ୍କାରୁ ବୃଦ୍ଧି ପାଇ ୧.୭୬ ଲକ୍ଷ କୋଟି ଟଙ୍କା ହୋଇଯାଇଛି । ବଜାର ସୂଚନା ଅନୁସାରେ ଗତ ବର୍ଷ ଏବଂ ପାର୍ବଣ ଋତୁରେ ଲୋୟର ବେସ୍ କାରଣରୁ କ୍ରେଡିଟ୍ କାର୍ଡ ଖର୍ଚ୍ଚରେ ବୃଦ୍ଧି ହୋଇଛି । ପାର୍ବଣ ଋତୁ ସମୟରେ ମାସିକ କିସ୍ତି ସୁବିଧା ଭଳି ଅନେକ ସ୍କିମ୍ ଆସିଥାଏ ଏବଂ ଏହି କାରଣରୁ କ୍ରେଡିଟ୍ କାର୍ଡର ବହୁଳ ବ୍ୟବହାର ହୋଇଥାଏ ।
Comments are closed.