ଡେସ୍କ: ବାଲେଶ୍ୱର ଜିଲ୍ଲାରେ ଜଣେ ୩୦ ବର୍ଷ ବୟସ୍କ ବ୍ୟକ୍ତିଙ୍କୁ ହତ୍ୟା ଅଭିଯୋଗରେ ମୃତକଙ୍କ ସ୍ତ୍ରୀ ସୁମିତ୍ରା ନାୟକ ଓ ତାଙ୍କ ପ୍ରଥମ ସ୍ୱାମୀ ଫକୀର ନାୟକଙ୍କୁ ପୁଲିସ ଗିରଫ କରିଛି। ଗତ ସପ୍ତାହରେ ଏକ ମୁଣ୍ଡ ବିହୀନ ମୃତଦେହ ମିଳିଥିଲା ଓ ପରେ ତାଙ୍କୁ ହତ୍ୟା କରାଯାଇଥିବା ଜଣାପଡିଥିଲା। ମୃତକ ଜଣକ ଶ୍ରୀଧର ଦଳବେହେରା ବୋଲି ଜଣାପଡିଛି।
ନଭେମ୍ବର ୧୨ରେ ବାଲେଶ୍ୱର ସହର ନିକଟ ଖାନନଗର ଶବଦାହ ଗୃହ ନିକଟରୁ ଶ୍ରୀଧରଙ୍କ ମୁଣ୍ଡ ବିହୀନ ମୃତଦେହ ମିଳିଥିଲା। ସେଠାରୁ ୯୦ କିଲୋମିଟର ଦୂର ଛତାବର ନିକଟରୁ ପୁଲିସ କଟା ମୁଣ୍ଡ ପାଇଥିଲା। ସୂଚନା ଅନୁଯାୟୀ, ଉଭୟ ସ୍ୱାମୀ-ସ୍ତ୍ରୀ ଓ ମୃତକ ନୟାଗଡ଼ ଜିଲ୍ଲାର ବାସିନ୍ଦା ହୋଇଥିବା ବେଳେ ବସୁଧା ପ୍ରକଳ୍ପ ନିର୍ମାଣ ନିର୍ମାଣ କାର୍ଯ୍ୟରେ ନିୟୋଜିତ ଥିଲେ। ପ୍ରାଥମିକ ଅନୁସନ୍ଧାନରୁ ଜଣାପଡିଛି ଯେ କିଛି ବିବାଦକୁ ନେଇ ଶ୍ରୀଧରଙ୍କୁ ହତ୍ୟା କରାଯାଇଥିଲା।
ସୂଚନା ଅନୁଯାୟୀ, ସୁମିତ୍ରା ଓ ଫକୀର ବିବାହିତ ହୋଇଥିଲେ ମଧ୍ୟ ଶ୍ରୀଧରଙ୍କ ସହ ସୁମିତ୍ରାଙ୍କ ପ୍ରେମ ସମ୍ପର୍କ ବୃଦ୍ଧି ପାଇଥିଲା ଓ ଶେଷରେ ଉଭୟ ଏକାଠି ରହିଥିଲେ। ଫଳରେ ପ୍ରଥମ ସ୍ୱାମୀ ଫକୀର ନିଜ ଗାଁକୁ ପଳେଇ ଯାଇଥିଲେ। ନଭେମ୍ବର ୫ରେ ଶ୍ରୀଧର ସୁମିତ୍ରାଙ୍କୁ କୌଣସି କାରଣକୁ ନେଇ ପ୍ରବଳ ମାଡ଼ ମାରିଥିଲେ। ତା ପରଦିନ, ଶ୍ରୀଧର ସୋଇଥିବା ଅବସ୍ଥାରେ ସୁମିତ୍ରା ଏକ କୁରାଢ଼ୀ ସାହାଯ୍ୟରେ ତାଙ୍କ ମୁଣ୍ଡ ଗଣ୍ଡି ଅଲଗା କରିଦେଇଥିଲେ। ପରେ ସେ ପ୍ରଥମ ସ୍ୱାମୀ ଫକୀରଙ୍କ ସହାୟତାରେ ମୃତଦେହକୁ ଫୋପାଡ଼ି ଦେଇଥିଲେ।
