ଭୁବନେଶ୍ବର: କରୋନା ସଂକ୍ରମଣ କ୍ଷେତ୍ରରେ ଯାଜପୁର ରାଜ୍ୟରେ ଶୀର୍ଷସ୍ଥାନ ଅଧିକାର କରିଛି । ଖୋର୍ଧା ଜିଲା ଦ୍ବିତୀୟ ଓ ବାଲେଶ୍ବର ଜିଲା ତୃତୀୟ ସ୍ଥାନରେ ରହିଛି । ଖୋର୍ଧାରେ ତବଲିଗି ସମ୍ପୃକ୍ତି ଯୋଗୁଁ ସଂଖ୍ୟା ବଢ଼ିଥିବାବେଳେ ବଙ୍ଗ ସଂଯୋଗ ଯାଜପୁର ଓ ବାଲେଶ୍ବର ପାଇଁ ପୀଡ଼ାଦାୟକ ହୋଇଛି ।
ରାଜ୍ୟ ସରକାରଙ୍କ ସୂତ୍ରରୁ ମିଳିଥିବା ସୂଚନା ଅନୁସାରେ ଓଡ଼ିଶାରେ କରୋନା ସଂକ୍ରମିତଙ୍କ ସଂଖ୍ୟା ୧୮୫କୁ ବୃଦ୍ଧି ପାଇଛି । ସର୍ବାଧିକ ୫୫ ଜଣ ଆକ୍ରାନ୍ତ ଯାଜପୁର ଜିଲ୍ଲାରେ ଚିହ୍ନଟ ହୋଇଥିବା ବେଳେ ଦ୍ୱିତୀୟରେ ୪୭ ଆକ୍ରାନ୍ତଙ୍କ ସହ ରହିଛି ଖୋର୍ଦ୍ଧା ଜିଲ୍ଲା । ୨୫ ସଂକ୍ରମିତଙ୍କ ସହ ତୃତୀୟରେ ବାଲେଶ୍ୱର ଥିବାବେଳେ ଭଦ୍ରକ ଜିଲ୍ଲାରେ ୨୧ ସଂକ୍ରମିତ ଠାବ ହୋଇଛନ୍ତି । । ସେହିଭଳି ୧୨ ଆକ୍ରାନ୍ତଙ୍କ ସହ ପଞ୍ଚମ ସ୍ଥାନରେ ରହିଛି ସୁନ୍ଦରଗଡ଼ ।
ସଂକ୍ରମିତଙ୍କ ମଧ୍ୟରୁ ୧୩୫ ଜଣ ହେଉଛନ୍ତି ପୁରୁଷ ଓ ୫୦ ଜଣ ହେଉଛନ୍ତି ମହିଳା । ଅନୁପାତ ଦେଖିଲେ ୭୩% ପୁରୁଷ କରୋନାରେ ପୀଡ଼ିତ ଥିବାବେଳେ ମହିଳାଙ୍କ ସଂଖ୍ୟା ୨୭%। ସେହିଭଳି ଆକ୍ରାନ୍ତଙ୍କ ମଧ୍ୟରେ ଅଧ ହେଉଛନ୍ତି ଯୁବଗୋଷ୍ଠୀ। ରାଜ୍ୟର ମୋଟ ସଂକ୍ରମିତଙ୍କ ଅଧା ହେଉଛନ୍ତି ଏହି ବର୍ଗର । ୪୯.୨ ପ୍ରତିଶତ ସଂକ୍ରମିତ ୧୫ରୁ ୪୦ ବର୍ଷୀୟ । ୩୧.୯ ପ୍ରତିଶତ ସଂକ୍ରମିତଙ୍କ ବୟସ ୪୧ରୁ ୬୦ ବର୍ଷ । ୧୧.୯ ପ୍ରତିଶତ ସଂକ୍ରମିତଙ୍କ ବୟସ ୬୦ ବର୍ଷରୁ ଅଧିକ । ସେହିଭଳି ୭ ପ୍ରତିଶତ ସଂକ୍ରମିତଙ୍କ ବୟସ ଜନ୍ମରୁ ୧୪ ବର୍ଷ ।
