ବର୍ଲିନ : ବୈଶ୍ବିକ ମହାମାରୀ କରୋନା ଯୋଗୁଁ ସମଗ୍ର ପୃଥିବୀରେ ନିନ୍ଦିତ ହେବାରେ ଲାଗିଛି ଚୀନ । ଏହି ଭୂତାଣୁରେ ପ୍ରାୟ ୨୩ ଲକ୍ଷରୁ ଅଧିକ ଲୋକ ସଂକ୍ରମିତ ହୋଇଥିବା ବେଳେ ମୃତ୍ୟୁ ସଂଖ୍ୟା ଦେଢ଼ ଲକ୍ଷ ଅତିକ୍ରମ କଲାଣି । କେବଳ ୟୁରୋପରେ ମୃତ୍ୟୁ ସଂଖ୍ୟା ୧ ଲକ୍ଷ ପାଖାପାଖି ହୋଇଛି । କେବଳ ସେତିକି ନୁହେଁ ସାରା ବିଶ୍ବର ଅର୍ଥନୀତିକୁ କରୋନା ଭୂତାଣୁ ନଷ୍ଟଭ୍ରଷ୍ଟ କରିଦେଇଛି । ଆମେରିକା, ଫ୍ରାନ୍ସ, ଇଂଲଣ୍ଡ ପରେ ଜର୍ମାନୀ ବି ଚୀନକୁ ଏଥିପାଇଁ ଦାୟୀ କରିଛି । ଆମେରିକା କରୋନା ଭୂତାଣୁ ସମ୍ପର୍କରେ ଚୀନ ଆଭ୍ୟନ୍ତରକୁ ଯାଇ ତଦନ୍ତ ଆବଶ୍ୟକତା ପାଇଁ କହିଛନ୍ତି । ଫ୍ରାନ୍ସ ରାଷ୍ଟ୍ରପତି ଚୀନକୁ ସିଧାସଳଖ ଦାୟୀ କରି ଭବିଷ୍ୟତ କାର୍ଯ୍ୟାନୁଷ୍ଠାନ ଲାଗି ଚୀନ ପ୍ରସ୍ତୁତ ହେବା ଆବଶ୍ୟକ ବୋଲି ମତ ଦେଇଛନ୍ତି । ଚୀନ ଯଦି ଜାଣିଶୁଣି ଏପରି କରିଛି ତେବେ ଏହାର ପରିଣାମ ଭୋଗିବ ବୋଲି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଶନିବାର କହିଥିଲେ । ଟ୍ରମ୍ପ କହିଥିଲେ ଯେ, ଯଦି ଭୁଲ ଅଜଣା ଭାବେ ହୋଇଛି ତାହା ଠିକ ଅଛି, କିନ୍ତୁ ଜାଣିଶୁଣି ଭୁଲ ହୋଇଥିଲେ କିଛି ଠିକ ହେବ ନାହିଁ । ଏପରି ସ୍ଥିତିରେ ଆଉ ପାଦେ ଆଗେଇ ଯାଇଛି ଜମାନୀ । ନିଜ ଦେଶରେ କରୋନାଜନିତ କ୍ଷତି ନିମନ୍ତେ ଚୀନଠାରୁ ୧୩ ହଜାର କୋଟି ପାଉଣ୍ଡ (୧୪୯ ବିଲିଅନ ୟୁରୋ) ଦାବି କରିଛି ଜର୍ମାନୀ ।
ଜର୍ମାନର ସର୍ବାଧିକ ପ୍ରସାରିତ ସମ୍ବାଦପତ୍ର ‘ବ୍ଲିଡ଼୍’ ପ୍ରକାଶିତ ରିପୋର୍ଟ ଅନୁସାରେ କରୋନା ଯୋଗୁଁ ଜର୍ମାନ ବିଭିନ୍ନ ଭାବରେ କ୍ଷତିଗ୍ରସ୍ତ ହୋଇଛି । ଦେଶର ଜିଡ଼ିପି ୪%ରୁ ଅଧିକ ହ୍ରାସ ପାଇଛି । ହାରାହାରି ପ୍ରତିଟି ଜର୍ମାନ ନାଗରିକଙ୍କ କ୍ଷତି ୧୭୮୪ ୟୁରୋ (୧୫୫୦ ପାଉଣ୍ଡ) । ଏଥିରେ ପର୍ଯ୍ୟଟନ, ଚଳଚ୍ଚିତ୍ର ଶିଳ୍ପ, ବିମାନ ଚଳାଚଳ ସଂସ୍ଥା, ଶିଳ୍ପ ସଂସ୍ଥା ସମସ୍ତେ କ୍ଷତିଗ୍ରସ୍ତ ହୋଇଛନ୍ତି । କେବଳ ପର୍ଯ୍ୟଟନ ଶିଳ୍ପରେ କ୍ଷତି ପରିମାଣ ୨୭ ନିୟୁତ ୟୁରୋ ଓ ଶିଳ୍ପ କ୍ଷେତ୍ରରେ ୫୦ ନିୟୁତ ୟୁରୋ କ୍ଷତି ଘଟିଛି। । ତେଣୁ ଏହି ପରିମାଣ ଅର୍ଥ ଚୀନଠାରୁ ଜର୍ମାନୀ ପାଇବାର ଆବଶ୍ୟକତା ଅଛି। ଏକ୍ସପ୍ରେସ ୟୁକେ ପକ୍ଷରୁ ପ୍ରକାଶିତ ସୂଚନା ଅନୁସାରେ ଜର୍ମାନର କ୍ଷତି ନିମନ୍ତେ ଚୀନ ୧୪୯ ବିଲିଅନ ୟୁରୋ କ୍ଷତିପୂରଣ ଦେବା ଆବଶ୍ୟକ ବୋଲି ବ୍ଲିଡ଼୍ କହିଛି । ଏହି ଖବରକାଗଜର ମୁଖ୍ୟ ସମ୍ପାଦକ ଜୁଲିଆନ ଚାଇଚେଲ୍ଡ଼ ଚୀନକୁ କଠୋର ସମାଲୋଚନା କରିଛନ୍ତି । ଚୀନ ରାଷ୍ଟ୍ରପତି ଓ ବୈଜ୍ଞାନିକମାନେ ଭୂତାଣୁ ସଂକ୍ରମଣରେ ସମ୍ପୂର୍ଣ୍ଣ ତଥ୍ୟ ଜାଣି ମଧ୍ୟ ସାରା ବିଶ୍ବକୁ ଅନ୍ଧାରରେ ରଖିଥିଲେ ବୋଲି କହିଛନ୍ତି ।
ଅନ୍ୟପକ୍ଷରେ ଚୀନ୍ କର୍ତ୍ତୃପକ୍ଷ ଏପରି ଦାବି ଓ ସମାଲୋଚନାକୁ ନେଇ ପାଲଟା ଅଭିଯୋଗ କରିଛନ୍ତି । ବିଦେଶୀଙ୍କ ପ୍ରତି ଘୃଣା ସୃଷ୍ଟି କରିବା ଉଦ୍ଦେଶ୍ୟରେ ଜର୍ମାନ ସମ୍ବାଦପତ୍ର ଏପରି ରିପୋର୍ଟ ପ୍ରକାଶ କରିଛି ବୋଲି ଚୀନ କହିଛି ।
