ଇନ୍ଦୋର: ନାଗରିକତା ସଂଶୋଧନ ଆଇନ(ସିଏଏ)କୁ ନେଇ ବିରୋଧୀ ହଙ୍ଗାମା କରୁଛନ୍ତି। ରାସ୍ତାକୁ ଓହ୍ଲାଇ ଆନ୍ଦୋଳନ କରୁଛନ୍ତି। କଂଗ୍ରେସ ନେତୃତ୍ଵରେ ବିଭିନ୍ନ ସ୍ଥାନରେ ବିକ୍ଷୋଭ ପ୍ରଦର୍ଶନ କରାଯାଉଛି। କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀଙ୍କ ସମେତ ରାହୁଲ ଗାନ୍ଧୀ ଏବଂ ପ୍ରିୟଙ୍କା ଗାନ୍ଧୀ ଏହି ଆଇନ ଗଣତନ୍ତ୍ର ବିରୋଧୀ ବୋଲି କହୁଛନ୍ତି। କିନ୍ତୁ ଖୋଦ୍ କଂଗ୍ରେସର ଜଣେ ବିଧାୟକ ଏଥିରେ ଏକମତ ହୋଇନାହାନ୍ତି। ସେ ଏହି ଆଇନ ସମର୍ଥନରେ ବାହାରିଛନ୍ତି।
ଏହି ବିଧାୟକ ଜଣକ ହେଉଛନ୍ତି ମଧ୍ୟପ୍ରଦେଶର ହରଦୀପ ସିଂହ ଡାଙ୍ଗ୍। ମନ୍ଦସୌର ଜିଲାର ସୁବାସରା ବିଧାୟକ ହରଦୀପ ସିଂହ ଗଣମାଧ୍ୟମକୁ କହିଛନ୍ତି ଯେ, ପାକିସ୍ତାନ, ବାଂଲାଦେଶ ଏବଂ ଆଫଗାନିସ୍ତାନରେ ସମସ୍ୟାର ସମ୍ମୁଖୀନ ହେଉଥିବା ବ୍ୟକ୍ତିଙ୍କୁ ଏଠାରେ ସୁବିଧା ମିଳିବା ଏବଂ ଯଦି ଆମେ ସିଏଏ ଓ ଏନଆରସିକୁ ଭିନ୍ନ ଦୃଷ୍ଟିରେ ଦେଖିବା, ତେବେ କୌଣସି ଅସୁବିଧା ନାହିଁ। ଜାମ୍ମୁ-କାଶ୍ମୀରରୁ ଧାରା ୩୭୦ ଉଚ୍ଛେଦ ହେବା ପରେ ଏହାକୁ ଅନେକେ ବିରୋଧ କରିଥିଲେ। କିନ୍ତୁ ତାଙ୍କ ସମେତ ବରିଷ୍ଠ କଂଗ୍ରେସ ନେତା ଜ୍ୟୋତିରାଦିତ୍ୟ ସିନ୍ଦିଆ ୩୭୦ ଉଚ୍ଛେଦ ନେଇ କେନ୍ଦ୍ର ସରକାରଙ୍କ ପଦକ୍ଷେପକୁ ସମର୍ଥନ କରିଥିଲେ ବୋଲି ହରଦୀପ କହିଛନ୍ତି।
