ସାଣ୍ଟିଆଗୋ: ଜଳୁଛି ଜଙ୍ଗଲ ବଢି ଚାଲିଛି ମୃତ୍ୟୁ ସଂଖ୍ୟା। ଚିଲି ଜଙ୍ଗଲରେ ଭୀଷଣ ନିଆଁ ଲାଗି ରହିଛି। ବର୍ତ୍ତମାନ ପର୍ଯ୍ୟନ୍ତ ଏହି ନିଆଁର ତାଣ୍ଡବରେ ଏଯାଏଁ ୧୨୦ଲୋକଙ୍କ ଜୀବନ ଚାଲି ଯାଇଛି। ଅନେକ ଲୋକେ ଏଥିରେ ଆହତ ମଧ୍ୟ ହୋଇଛନ୍ତି। ସ୍ଥିତି ଜଟିଳ ହେବାକୁ ଆରମ୍ଭ କରିଥିବା ବେଳେ ଦେଶରେ ଜରୁରୀକାଳୀନ ପରିସ୍ଥିତି ଘୋଷଣା କରାଯାଇଛି।
ସୂଚନା ଯୋଗ୍ୟ, ଚିଲିରେ ଭୟଙ୍କର ରୂପ ନେଉଛି ଜଙ୍ଗଲ ନିଆଁ। ଆଗକୁ ମୃତ୍ୟୁ ସଂଖ୍ୟା ବଢିବାର ଆଶଙ୍କା କରାଯାଉଛି। ହଜାର ହଜାର ଲୋକ ଏଥିରେ ନିଖୋଜ ଥିବା ସୂଚନା ମିଳିଛି। ନିଆଁ ଲାଗି ୧୪୦୦ ଘର ପୋଡି ପାଉଁଶ ହୋଇଯାଇଛି। ଜଙ୍ଗଲ ନିଆଁ ଜନିତ ଧୂଳି ଓ ଧୂଆଁରେ କେନ୍ଦ୍ରୀୟ ଚିଲିର ପ୍ରାୟ ୧୦ଲକ୍ଷ ଲୋକ ପ୍ରଭାବିତ ହୋଇଛନ୍ତି। ଜଙ୍ଗଲ ନିଆଁକୁ ଲିଭାଇବା ଲାଗି ହେଲିକପ୍ଟର ଓ ଦମକଳ ନିୟୋଜିତ ହୋଇଛି। ପର୍ଯ୍ୟଟନ ସହର ଭିନା ଡେଲ ମାର ବନାଗ୍ନିରେ ସର୍ବାଧିକ ପ୍ରଭାବିତ ହୋଇଛି।ରାଷ୍ଟ୍ରପତି ଗାବ୍ରିଏଲ ବୋରିକ୍ କହିଛନ୍ତି, ଦେଶ ବଡ ବିପର୍ଯ୍ୟୟର ସମ୍ମୁଖୀନ ହୋଇଛି। ଗତବର୍ଷ ଜଙ୍ଗଲ ନିଆଁ ଯୋଗୁଁ ୯ଲକ୍ଷ ୯୦ହଜାର ହେକ୍ଟର ଜଙ୍ଗଲ ପୋଡି ଯିବା ସହିତ ୨୭ଜଣ ଲୋକ ପ୍ରାଣ ହରାଇଥିଲେ।
Comments are closed.