ନୂଆଦିଲ୍ଲୀ: ଛତିଶଗଡ଼ରେ ବୋରୱେଲରେ ନାବାଳକ ରାହୁଲ ପଡ଼ିଯିବା ଘଟଣା । ରାହୁଲଙ୍କ ବାପା ଏନେଇ ପ୍ରତିକ୍ରିୟା ରଖିଛନ୍ତି । ସେ କହିଛନ୍ତି ମହାପ୍ରଭୁ ଜଗନ୍ନାଥଙ୍କ କୃପାରୁ ମୋ ପୁଅ ଉଦ୍ଧାର ହୋଇଛି । ପୁଅ ଭଲ ହୋଇ ଘରକୁ ଫେରିଲେ ଆମେ ପୁରୀକୁ ଯିବୁ । ପୂର୍ବରୁ ମଧ୍ୟ ଆମେ ପୁରୀକୁ ଯାଇଥିଲୁ । ସେହି ସମୟରେ ପୁରୀରେ ପୁଅ ହଜିଯାଇଥିଲା । ସମୁଦ୍ରରେ ଗାଧୋଇବା ବେଳେ ରାହୁଲକୁ ଆମେ ପାଇନଥିଲୁ । ପରେ ରାହୁଲକୁ ଆମେ ଖୋଜାଖୋଜି କରିବା ସହ ସ୍ଥାନୀୟ ଲୋକଙ୍କୁ ରାହୁଲର ଫଟୋ ଦେଖାଇଥିଲୁ ।
ସେଠାରେ ଦୁଇଜଣ ଲୋକ ରାହୁଲକୁ ଖୋଜି ଆମକୁ ଦେଇଥିଲେ । ମହାପ୍ରଭୁଙ୍କ ସ୍ନାନଯାତ୍ରା ସମୟରେ ପୁଅ ଉଦ୍ଧାର ହେବା କେବଳ ମହାପ୍ରଭୁଙ୍କ କୃପା ବୋଲି କହିଲେ ରାହୁଲଙ୍କ ବାପା । ତାହାସହ କଟକର ଏନଡିଆରଏଫ୍ ଟିମକୁ ମଧ୍ୟ ରହୁଲଙ୍କ ବାପା ପ୍ରଶଂସା କରିଛନ୍ତି ।
ସୂଚନା ଥାଉକି ୧୧ବର୍ଷିୟ ନାବାଳକ ରାହୁଲ ବୋରୱେଲରେ ପଡ଼ିଯାଇଥିଲେ । ଦୀର୍ଘ ୫ଦିନର ରେସ୍କ୍ୟୁ ଅପରେସନ ପରେ ରାହୁଲକୁ ଉଦ୍ଧାର କରିଥିଲା ଏନଡିଆରଏଫ୍ ଟିମ୍ । ଉଦ୍ଧାର କରିବା ପରେ ରାହୁଲକୁ ଆମ୍ବୁଲାନ୍ସ ଯୋଗେ ଡାକ୍ତରଖାନାରେ ଭର୍ତ୍ତି କରାଯାଇଛି । ଗତକାଲି ରାହୁଲକୁ ସାମନ୍ୟ ଜ୍ୱର ଥିବା କହିଥିଲେ ଡାକ୍ତର । ହେଲେ ଆଜି ରାହୁଲ ସୁସ୍ଥ ଥିବା ଡାକ୍ତର କହିଛନ୍ତି ।
