ଚୌଦ୍ୱାର: ଚୌଦ୍ୱାର ପୌରପାଳିକାରେ ବିଭିନ୍ନ ଯୋଜନାରେ ହୋଇଥିବା ଅନିୟମିତତାକୁ ନେଇ ସ୍ଥାନୀୟ ସୂଚନା ଅଧିକାର କର୍ମୀମାନଙ୍କ ତରଫରୁ କରାଯାଇଥିବା ଅଭିଯୋଗ ପରିପ୍ରେକ୍ଷୀରେ ଲୋକୟୁକ୍ତଙ୍କ ଏକ ଟିମ୍ ପୌରପାଳିକାର ବିଭିନ୍ନ ୱାର୍ଡକୁ ଯାଇ ବିଭିନ୍ନ ଉନ୍ନୟନ କାର୍ଯ୍ୟର ତଦନ୍ତ କରି ଫେରିଯାଇଛନ୍ତି।
ମିଳିଥିବା ସୂଚାନୁଯାୟୀ, ୨୦୧୭ ରୁ ୨୦୨୦ ମସିହାରେ ନିର୍ବାଚିତ କାଉନସିଲ ନଥିବା ସମୟରେ କାର୍ଯ୍ୟକାରୀ ହୋଇଥିବା ବିଭିନ୍ନ ଉନ୍ନୟନ ଯୋଜନାରେ ବହୁ ଅର୍ଥ ବାଟମାରଣା ହୋଇଥିବା ଅଭିଯୋଗ କରି କାର୍ଯ୍ୟର ସଂପୂର୍ଣ୍ଣ ବିବରଣୀ ପ୍ରଦାନ ପାଇଁ ସୂଚନା ଅଧିକାର କର୍ମୀ ମନୋଜ ସାହୁ ଆରଟିଆଇରେ ଚୌଦ୍ୱାର ପୌରପାଳିକାକୁ ତଥ୍ୟ ମାଗିଥିଲେ। ପୌରପାଳିକା ତରଫରୁ ଦିଆ ଯାଇଥିବା ତଥ୍ୟ ଉପରେ ସନ୍ଦେହ ପ୍ରକଟ କରି ସେ ଲୋକାୟୁକ୍ତଙ୍କ ପାଖରେ ୨୦୨୧ ମସିହାରେ ଅଭିଯୋଗ କରିଥିଲେ। ଲୋକାୟୁକ୍ତ ଉପ ନିର୍ଦ୍ଦେଶକ ବି.ଏନ.ଆଚାର୍ଯ୍ୟ, ସହକାରୀ ଅଧିକ୍ଷଣ ଯନ୍ତ୍ରୀ ଜଗବନ୍ଧୁ ମିଶ୍ର, ସୁଶାନ୍ତ ମିଶ୍ର ଓ ପୁଲିସ ଅଧିକାରୀ ସୁନିଲ ପଟ୍ଟନାୟକ ପ୍ରମୁଖ ଅଭିଯୋଗ ହୋଇଥିବା ୱାର୍ଡଗୁଡିକୁ ଯାଇ ଘଟଣାସ୍ଥଳ ପରିଦର୍ଶନ କରିଥିଲେ। ଅଭିଯୋଗଯୁକ୍ତ କାର୍ଯ୍ୟଗୁଡିକ ଦାୟିତ୍ୱରେ ଥିବା ସମସ୍ତ ଅଧିକାରୀ ଓ କର୍ମକର୍ତ୍ତା ଘଟଣାସ୍ଥଳରେ ଉପସ୍ଥିତ ଥିବା ଦେଖିବାକୁ ମିଳିଥିଲା। ଟିିମ୍ ପୌରପାଳିକାର ୬ ଓ ୭ନଂ ୱାର୍ଡର ବିଭିନ୍ନ କାର୍ଯ୍ୟ ଅନୁଧ୍ୟାନ କରିଥିବା ବେଳେ ଅନ୍ୟ କିଛି ୱାର୍ଡରେ ମଧ୍ୟ ଅଭିଯୋଗ ରହିଛି, ଯାହାର ତଦନ୍ତ ଜାରି ରହିବ ବୋଲି ନିର୍ବାହୀ ଅଧିକାରୀ ସଞ୍ଜୀବ କୁମାର ମହାପାତ୍ର ସୂଚନା ଦେଇଛନ୍ତି।
Comments are closed.