ନୂଆଦିଲ୍ଲୀ : କେନ୍ଦ୍ରୀୟ ତଦନ୍ତକାରୀ ସଂସ୍ଥା ସିବିଆଇ ଗତ ତିନି ବର୍ଷ ମଧ୍ୟରେ ୪,୧୦୦ରୁ ଅଧିକ ସରକାରୀ କର୍ମଚାରୀଙ୍କ ବିରୋଧରେ ଭ୍ରଷ୍ଟାଚାର ମାମଲା ରୁଜୁ କରିଛି । ସେଥିମଧ୍ୟରୁ ୯୦୦ଟି ମାମଲାରେ ଅଭିଯୋଗ ପତ୍ର ଦାଖଲ କରାଯାଇଛି ବୋଲି କେନ୍ଦ୍ର ଉତ୍ତର ପୂର୍ବାଞ୍ଚଳ ବିକାଶ ରାଜ୍ୟ ମନ୍ତ୍ରୀ ଡ଼କ୍ଟର ଜିତେନ୍ଦ୍ର ସିଂହ କହିଛନ୍ତି।
ଡ଼କ୍ଟର ସିଂହ ବୁଧବାର ସଂସଦରେ ସୂଚନା ଦେଇ କହିଛନ୍ତି ଯେ, ଗତ ତିନି ବର୍ଷ ମଧ୍ୟରେ ୪,୧୨୩ ଜଣ ସରକାରୀ କର୍ମଚାରୀଙ୍କ ବିରୋଧରେ ଭ୍ରଷ୍ଟାଚାର ମାମଲାରେ ମାମଲା ରୁଜୁ କରାଯାଇଛି । ସିବିଆଇର ରିପୋର୍ଟ ଆନୁସାରେ ୨୦୧୬, ୨୦୧୭ ଏବଂ ୨୦୧୮ ମଧ୍ୟରେ ୪,୧୨୩ ଜଣ ସରକାର କର୍ମଚାରୀଙ୍କ ବିରୋଧରେ ୧,୭୬୭ ଟି ଭ୍ରଷ୍ଟାଚାର ମାମଲା ରୁଜୁ କରାଯାଇଛି । ୧,୭୬୭ଟି ମାମଲା ମଧ୍ୟରୁ ୯୦୦ଟି ମାମଲାରେ ଅଭିଯୋଗ ପତ୍ର ଦାଖଲ କରାଯାଇଛି । ୫୯ ମାମଲାରେ ନିୟମିତ ବିଭାଗୀୟ କାର୍ଯ୍ୟନୁଷ୍ଠାନ ପାଇଁ ନିବେଦନ କରାଯାଇଛି । ସେହିପରି ୮୯ ମାମଲାକୁ ବନ୍ଦ କିମ୍ବା ସମାଧାନ କରାଯାଇଛି ।
ଡ଼କ୍ଟର ସିଂହ ଲୋକସଭାରେ କହିଛନ୍ତି ଯେଉଁ ୯୦୦ଟି ମାମଲାରେ ଅଭିଯୋଗ ପତ୍ର ଦାଖଲ କରାଯାଇଛି ସେଥି ମଧ୍ୟରୁ ୧୯ଟି ମାମଲାରେ ଅଭିଯୁକ୍ତ ଦୋଷୀ ସାବ୍ୟସ୍ତ ହୋଇଛନ୍ତି, ୯ଜଣ ଖଲାସ ହୋଇଛନ୍ତି ଏବଂ ୪ଟି ମାମଲାର ସମାଧାନ କରାଯାଇଛି।
ଭ୍ରଷ୍ଟାଚାର କରୁଥିବା ଲୋକଙ୍କ ଆଦୌ ବରଦାସ୍ତ କରାଯିବ ନାହିଁ । ସରକାର ଭ୍ରଷ୍ଟାଚାର ରୋକିବା ପାଇଁ ବିଭିନ୍ନ ପ୍ରକାର ଉପାୟ କରୁଛନ୍ତି ବୋଲି ଡ଼କ୍ଟର ସିଂହ କହିଛନ୍ତି ।
୨୬ ଜୁଲାଇ ୨୦୧୮ରେ ସରକାର ଭ୍ରଷ୍ଟାଚାର ନିରୋଧକ ଅଧିନିୟମରେ ସଂଶୋଧନ କରିଛନ୍ତି ,ଫଳରେ ଭ୍ରଷ୍ଟାଚାର ରୋକିବା କରିବାରେ ଯଥେଷ୍ଟ ପରିବର୍ତ୍ତନ ଆଣାଯାଇ ପାରିବ । ଏହି ଅଧିନିୟମ ଅନୁସାରେ ଲାଞ୍ଚ ନେବାକୁ ସ୍ପଷ୍ଟ ଭାବେ ଅପରାଧ ବୋଲି ବିବେଚନା କରାଯାଉଛି ।
