ମାନାମା: ଜୁଲାଇ ୪ ରଥଯାତ୍ରା ଅବସରରେ ସୁଦୂର ବାହାରିନରେ ପ୍ରବାସୀ ଓଡ଼ିଆଙ୍କ ପକ୍ଷରୁ ରଥଯାତ୍ରା ପାଳନ କରାଯାଇଛି। ବାହାରିନରେ ଥିବା ପ୍ରବାସୀ ଓଡ଼ିଆ ଏବଂ ଇସ୍କନ କାନୁ ଗାର୍ଡେନର ମିଳିତ ଆନୁକୂଲ୍ୟରେ ବିଶ୍ଵପ୍ରସିଦ୍ଧ ଘୋଷଯାତ୍ରା ଅନୁଷ୍ଠିତ ହୋଇଥିଲା। ସ୍ଥାନୀୟ ବାନ୍ ସେଙ୍ଗ୍ ଥାଇ ଅଡିଟୋରିୟମରେ ପାରମ୍ପରିକ ରୀତିନୀତିରେ ରଥଯାତ୍ରା ଆରମ୍ଭ ହୋଇଥିଲା। ତିନି ଠାକୁରଙ୍କୁ ପହଣ୍ଡି କରାଯାଇ ନବନିର୍ମିତ ସୁସଜ୍ଜିତ ରଥକୁ ନିଆଯାଇ ପୂଜାର୍ଚ୍ଚନା କରାଯାଇଥିଲା। ପରେ ଶତାଧିକ ଶ୍ରଦ୍ଧାଳୁ ରଥ ଟାଣିଥିଲେ। ଜାତି, ଧର୍ମ, ବର୍ଣ୍ଣ, ନିର୍ବିଶେଷରେ ସମସ୍ତ ଭକ୍ତଙ୍କୁ ରଥ ଟାଣିବାର ସୁଯୋଗ ଦିଆଯାଇଥିଲା। ପ୍ରବାସୀ ଓଡ଼ିଆଙ୍କ ସମେତ ବାହାରିନରେ ରହୁଥିବା ବିଭିନ୍ନ ଦେଶର ୭୫୦ରୁ ଊର୍ଦ୍ଧ୍ଵ ଭକ୍ତଙ୍କ ସମାଗମ ହୋଇଥିଲା। ନେପାଳ ରାଷ୍ଟ୍ରଦୂତ ପଦମ୍ ସୁନ୍ ଦାସ ରଥଯାତ୍ରାରେ ସାମିଲ ହୋଇଥିଲେ। ଏହା ଛଡା ମୁମ୍ବାଇ ଇସ୍କନର ପ୍ରମୁଖ ଅତୁଲ୍ୟ କୃଷ୍ଣ ଦାସ ଯୋଗଦେଇ ଜଗନ୍ନାଥ ସଂସ୍କୃତିର ମହନୀୟତା ବିଷୟରେ ପ୍ରବଚନ ଦେଇଥିଲେ। ଏହି ଅବସରରେ ସାଂସ୍କୃତିକ କାର୍ଯ୍ୟକ୍ରମ ଆୟୋଜିତ ହୋଇଥିଲା।
Image courtesy – Deepak sahu
