ନୂଆଦିଲ୍ଲୀ: ରାଜନୀତି ଛାଡ଼ିବାକୁ ସବୁଦିନ ଭାବୁଛି, ଏଥିରେ ପାଗଳାମୀ ଭରି ରହିଛି । ସେଥିପାଇଁ ଏହି ଚାକିରି ଛାଡିବାକୁ ଚାହୁଁଛି । ଏଭଳି କିଛି କହିଛନ୍ତି କାନାଡା ପ୍ରଧାନମନ୍ତ୍ରୀ ଜଷ୍ଟିନ୍ ଟ୍ରୁଡୋ । ଏହାସହିତ ଆଗାମୀ ନିର୍ବାଚନ ପର୍ଯ୍ୟନ୍ତ ନିଜ ପଦବୀରେ ରହିବେ ବୋଲି ଦୃଢୋକ୍ତି ପ୍ରକାଶ କରିଛନ୍ତି ଟ୍ରୁଡୋ । ତାଙ୍କର ଏଭଳି ବୟାନ ଏବେ କାନାଡା ରାଜନୀତିରେ ହଇଚଇ ସୃଷ୍ଟି କରିଛି । ୨୦୨୫ ଅକ୍ଟୋବରରେ କାନାଡାରେ ନିର୍ବାଚନ ହେବ ।
କାନାଡାରେ ହୋଇଥିବା ସର୍ଭେ ଅନୁସାରେ, ଦେଶରେ ନିର୍ବାଚନ ହେଲେ କଞ୍ଜରଭେଟିବ୍ସ ପାର୍ଟିଠାରୁ ଲିବେରାଲ ପାର୍ଟିକୁ ବୃହତ ପରାଜୟର ସାମ୍ନା କରିବାକୁ ପଡିପାରେ । କାରଣ କାନାଡାରେ ଟ୍ରୁଡୋଙ୍କ ବିରୋଧରେ ପ୍ରବଳ ଜନ ଅସନ୍ତୋଷ ପ୍ରକାଶ ପାଇବାରେ ଲାଗିଛି । ୨୦୧୫ ନଭେମ୍ବରରେ ପ୍ରଥମ ଥର ଟ୍ରୁଡୋ ପ୍ରଧାନମନ୍ତ୍ରୀ ଭାବେ କାର୍ଯ୍ୟଭାର ସମ୍ଭାଳିଥିଲେ । ଅନେକ ସର୍ଭେରୁ ଟ୍ରୁଡୋ ହାରିବା ସୁନିଶ୍ଚିତ ବୋଲି କୁହାଯାଉଛି । ଆପଣ ରାଜନୀତି ଛାଡିବା ବିଷୟରେ ଭାବୁଛନ୍ତି କି ଏକ ପ୍ରଶ୍ନର ଉତ୍ତର ଦେଇ ଟ୍ରୁଡୋ କହିଛନ୍ତି, ‘ମୁଁ ସବୁଦିନ ରାଜନୀତି ଛାଡିବାକୁ ଭାବୁଛି’ । ଏହା ଏକ ପାଗଳାମୀ ଭରି ରହିଥିବା କାର୍ଯ୍ୟ । ଯେଉଁଥିରେ ମୁଁ ବ୍ୟକ୍ତିଗତ ଭାବେ ବଳିଦାନ ଦେଉଛି । ଯାହା ମୋ ପାଇଁ ବହୁତ କଷ୍ଟଦାୟକ । ଗତବର୍ଷ ଟ୍ରୁଡୋ ଏବଂ ତାଙ୍କ ପତ୍ନୀ ବିବାହର ୧୮ବର୍ଷ ପରେ ଅଲଗା ହେଉଥିବା ଘୋଷଣା କରିଥିଲେ ।
