କଟକ : ମହାନଦୀ ପୋଲରୁ ବସ ଖସିବା ଘଟଣାରେ ଗୁରୁତରଙ୍କ ମଧ୍ୟରୁ ୭ଜଣଙ୍କ ଅବସ୍ଥା ସଙ୍କଟାପନ୍ନ ରହିଛି। ସେମାନଙ୍କୁ କଟକ ବଡ ମେଡିକାଲ ଆଇସିୟୁରେ ଭର୍ତ୍ତି କରାଯାଇଛି। ସେମାନଙ୍କ ମଧ୍ୟରୁ ୩ଜଣଙ୍କୁ ଟ୍ରୋମା ଆଇସିୟୁ ଓ ୪ଜଣଙ୍କୁ ସେଣ୍ଟ୍ରାଲ ଆଇସିୟୁରେ ଭର୍ତ୍ତି କରାଯାଇଛି। ଆହତଙ୍କ ମଧ୍ୟରେ ୩୫ଜଣ କଟକ ବଡ ମେଡିକାଲରେ ଚିକିତ୍ସିତ ହେଉଥିବା ବେଳେ ଅନ୍ୟ ୮ଜଣଙ୍କୁ ପରିବାରବର୍ଗ ଘରୋଇ ନର୍ସିଂହୋମକୁ ନେଇଯାଇଥିବା ମେଡିକାଲ କର୍ତ୍ତୃପକ୍ଷ ସୂଚନା ଦେଇଛନ୍ତି। ଦୁର୍ଘଟଣା ପରେ ଆହତମାନଙ୍କୁ ଉଦ୍ଧାର କରାଯାଇ ଏସସିବିରେ ଭର୍ତ୍ତି କରାଯାଇଥିଲା। ସ୍ବତନ୍ତ୍ର ଟିମ କରି ଆହତମାନଙ୍କର ଚିକିତ୍ସା କରାଯାଉଛି। ମଙ୍ଗଳବାର ରାତିରେ ଦୁର୍ଘଟଣାରେ ୧୦ଜଣ ବ୍ୟକ୍ତି ମୃତ୍ୟୁବରଣ କରିଥିଲେ। ମୃତକମାନଙ୍କର ଶବ ବ୍ୟବଚ୍ଛେଦ କରାଯାଉଛି। ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ମୃତଦେହ ହସ୍ତାନ୍ତର କରାଯିବ।
ସୂଚନାଯୋଗ୍ୟ ଯେ, ମଙ୍ଗଳବାର ରାତିରେ ତାଳଚେରରୁ କଟକ ଆସୁଥିବା ‘ଜଗନ୍ନାଥ’ ନାମକ ଏକ ବସ ଜଗତପୁର ନିକଟ ମହାନଦୀ ପୋଲରୁ ଖସି ପଡିଥିଲା। ବସଟି ଏକ ମଇଁଷିକୁ ଧକ୍କା ଦେଇ ୩୦ଫୁଟ ତଳକୁ ପୋଲରୁ ଖସି ପଡିଥିଲା। ମଙ୍ଗଳବାର ରାତିରେ ଦୁର୍ଘଟଣାରେ ୧୦ଜଣ ଯାତ୍ରୀଙ୍କର ମୃତ୍ୟୁ ହୋଯାଇଥିଲା। ମହାନଦୀ ମଝିରେ ବସଟି ପଡିଥିବା ବେଳେ ଅନ୍ଧାର ଯୋଗୁଁ ଉଦ୍ଧାର କାର୍ଯ୍ୟରେ ଅନେକ ବାଧା ଦେଖା ଦେଇଥିଲା। ଉଦ୍ଧାରକାରୀ ଦଳ ୪ଟି ବୋଟ୍ ସାହାର୍ଯ୍ୟରେ ମହାନଦୀକୁ ଯିବା ସହ କିଛି ବାଟ ଚାଲିଚାଲି ଯାଇ ଆହତମାନଙ୍କୁ ଉଦ୍ଧାର କରି କଟକ ବଡ ମେଡିକାଲରେ ଭର୍ତ୍ତି କରିଥିଲେ। ଉଦ୍ଧାର କାର୍ଯ୍ୟରେ ଓଡ୍ରାଫ ଟିମ୍, ଅଗ୍ନିଶମ ବିଭାଗ ଓ ସ୍ଥାନୀୟ ପୁଲିସ ସାମିଲ ହୋଇଥିଲେ।
