ନୂଆଦିଲ୍ଲୀ: ଅପହୃତ ବୁଲଗେରିଆ ଜାହାଜ ଏମଭି ରୁଏନ୍ ଉପରେ ସଫଳତାର ସହ ଉଦ୍ଧାର କାର୍ଯ୍ୟ କରିଥିବାରୁ ବୁଲଗେରିଆ ରାଷ୍ଟ୍ରପତି ରୁମେନ୍ ରାଦେଭ ଭାରତୀୟ ନୌସେନାକୁ କୃତଜ୍ଞତା ଜଣାଇଛନ୍ତି। ୭ ଜଣ ବୁଲଗେରିଆ ନାଗରିକଙ୍କ ସମେତ କ୍ରୁ ସଦସ୍ୟଙ୍କୁ ଉଦ୍ଧାର କରିଥିବାରୁ ରାଷ୍ଟ୍ରପତି ରାଦେଭ ଭାରତୀୟ ନୌସେନାକୁ ଧନ୍ୟବାଦ ଜଣାଇଛନ୍ତି। ସୋମବାର ବୁଲଗେରିଆର ବୈଦେଶିକ ମନ୍ତ୍ରୀ ମାରିଆ ଗାବ୍ରିଏଲ, ବୁଲଗେରିଆରେ ଅବସ୍ଥାପିତ ଭାରତୀୟ ରାଷ୍ଟ୍ରଦୂତ ସଞ୍ଜୟ ରାଣାଙ୍କ ସହ ଆଲୋଚନା କରି ବୁଲଗେରିଆ ନାଗରିକଙ୍କୁ ଉଦ୍ଧାର କରିଥିବାରୁ ଧନ୍ୟବାଦ ଜଣାଇଥିଲେ। ସମସ୍ତ ନାବିକଙ୍କ ସ୍ୱାସ୍ଥ୍ୟାବସ୍ଥା ଭଲ ରହିଛି ଏବଂ ସେମାନଙ୍କୁ ଠିକ୍ ସମୟରେ ବୁଲଗେରିଆକୁ ଫେରାଇ ଆଣିବା ପାଇଁ ପ୍ରୟାସ ଜାରି ରହିଛି ବୋଲି ସେ କହିଛନ୍ତି। ଗତ ବର୍ଷ ଡିସେମ୍ବର ମାସରେ ୟେମେନର ସୋକୋଟ୍ରା ଦ୍ୱୀପ ନିକଟରେ ଆରବ ସାଗରରେ ଡକାୟତମାନେ ୭ ଜଣ ବୁଲଗେରିଆ, ୯ ଜଣ ମିଆଁମାର ଏବଂ ଜଣେ ଆଙ୍ଗୋଲା ନାଗରିକଙ୍କୁ ନେଇ ଯାଉଥିବା ରୁଏନ୍ ଜାହାଜକୁ ଅପହରଣ କରି ନେଇଥିଲେ। ଭାରତୀୟ ନୌସେନାର ସୂଚନା ଅନୁଯାୟୀ ଆଇଏନଏସ କୋଲକାତା ଭାରତୀୟ ଉପକୂଳରୁ ପ୍ରାୟ ୨୬୦୦ କିଲୋମିଟର ଦୂରରେ ଯାତ୍ରା କରୁଥିବା ଅପହୃତ ଜାହାଜକୁ ଅଟକାଇ ଥିଲା। ୪୦ ଘଣ୍ଟା ଧରି ଚାଲିଥିବା ଏହି ଅଭିଯାନରେ ଭାରତୀୟ ଯୁଦ୍ଧ ଜାହାଜ ଆଇଏନଏସ ସୁଭଦ୍ରା, ଡ୍ରୋନ୍, ସାମୁଦ୍ରିକ ପାଟ୍ରୋଲିଂ ଏୟାରକ୍ରାଫ୍ଟ ଏବଂ ମାର୍କୋସ୍ ପ୍ରହାର ସହଯୋଗ କରିଥିଲେ।
Comments are closed.