ଶେଷ ହେଲା ବଜେଟ ଅଧିବେଶନ: ଉଭୟ ଗୃହ ଅନିର୍ଦ୍ଧିଷ୍ଟ କାଳ ପାଇଁ ମୁଲତବୀ

ନୂଆଦିଲ୍ଲୀ: ବଜେଟ୍‍ ଅଧିବେଶନର ବୁଧବାର ଥିଲା ଶେଷ କାର୍ୟ୍ୟ ଦିବସ ଓ ଶେଷ ଦିନରେ ରାଜ୍ୟ ସଭାକୁ ଅନିର୍ଦ୍ଧିଷ୍ଟକାଳ ପାଇଁ ସ୍ଥଗିତ ରଖାଯାଇଛି। ପାର୍ଲାମେଣ୍ଟର ଉଭୟ ଗୃହର ମିଳିତ ଅଧିବେଶନରେ ରାଷ୍ଟ୍ରପତିଙ୍କ ଭାଷଣ ଉପରେ ବିନା ଆଲୋଚନାରେ ଧନ୍ୟବାଦ ପ୍ରସ୍ତାବ ଗୃହର ଅନୁମୋଦନ ଲାଭ କରିଥିଲା। ୨୦୧୯-୨୦ ମଧ୍ୟବର୍ତ୍ତୀକାଳୀନ ବଜେଟ୍‍, ୨୦୧୯ ଅସ୍ଥାୟୀ ଖର୍ଚ୍ଚ ଦାବି ବିଲ୍‍, ୨୦୧୯ ବ୍ୟୟବରାଦ ବିଲ୍‍ ଓ ୨୦୧୯ ଅର୍ଥ ବିଲ୍‍ ଉପରେ ମଧ୍ୟ କୌଣସି ଆଲୋଚନା ବିନା ମୌଖିକ ଭୋଟରେ ପାସ୍‍ କରାଯାଇଥିଲା। ରାଜ୍ୟସଭା ଅଧ୍ୟକ୍ଷ ଏମ. ଭେଙ୍କୟା ନାଇଡୁ ଗୃହ କାର୍ଯ୍ୟରେ ବାଧା ସୃଷ୍ଟିକୁ ନେଇ ତାଙ୍କ ଉଦ୍‍ଯାପନୀ ଅଭିଭାଷଣରେ ଅସନ୍ତୋଷ ବ୍ୟକ୍ତ କରିଥିଲେ। ସେ କହିଥିଲେ, ମୋଟ ଅଧିବେଶନ କାଳରେ ମାତ୍ର ଶତକଡା ୪ଦଶକମିକ ୯ଭାଗ କାର୍ଯ୍ୟ ହୋଇଛି। ସେହିପରି ଲୋକସଭାରେ ଏସ.ପି. ଓ ଟିଏମସି ସଦସ୍ୟମାନଙ୍କ ଦ୍ୱାରା ହୋ ହାଲ୍ଲା ମଧ୍ୟରେ ଅନିୟନ୍ତ୍ରିତ ଜମା ଯୋଜନା ବିଲ୍‍-୨୦୧୮ ଗୃହରେ ଅନୁମୋଦିତ ହୋଇଥିଲା। ଏ ସମ୍ପର୍କରେ ଅର୍ଥମନ୍ତ୍ରୀ ପିୟୁଷ ଗୋଏଲ କହିଥିଲେ ଯେ ଏହି ବିଲ୍‍ ଅଣସଂଗଠିତ କ୍ଷେତ୍ରରେ କାର୍ଯ୍ୟ କରୁଥିବା ଗରିବଲୋକମାନଙ୍କୁ ସୁରକ୍ଷା ଦେବ।