ବ୍ରହ୍ମପୁର: ସଦର ଥାନା ପୋଲିସକୁ ବଡ଼ ସଫଳତା । ଏକ ବଡ଼ ଧରଣର ବାଇକ ଚୋରି ରାକେଟର ଫର୍ଦ୍ଦାଫାଶ କରିଛି ସଦର ଥାନା ପୋଲିସ । ଘଟଣାରେ ଦୁଇ ଜଣ ବାଇକ ଲୁଟେରାକୁ ପୋଲିସ ଗିରଫ କରିବା ସହ ସେମାନଙ୍କ ନିକଟରୁ ୧୬ଟି ଚୋରା ବାଇକ ଜବତ କରିଛି । ଏନେଇ ସଦର ଏସଡିପିଓ ଶିବଶଙ୍କର ମହାପାତ୍ର ପ୍ରେସ୍ ବିବୃତିରେ ସୂଚନା ଦେଇଛନ୍ତି । ଗତକାଲି ଲୋଚାପଡା ଛକରେ ପୋଲିସ ଗାଡି ଯାଞ୍ଚ କରୁଥିବା ସମୟରେ ଟିଭିଏସ୍ ଆପାଚି ବାଇକରେ ଦୁଇ ଜଣ ବ୍ୟକ୍ତି ଦ୍ରୁତଗତିରେ ଯାଉଥିଲେ । ସେମାନଙ୍କୁ ପୋଲିସ ଅଟକାଇ ଗାଡି କାଗଜ ପତ୍ର ଯାଞ୍ଚ କରିଥିଲେ । ପରେ ସନ୍ଦେହ ହେବାରୁ ପୋଲିସ ଅଧିକ ପଚରାଉଚୁରା କରିଥିଲା । ପଚରାଉଚରା ବେଳେ ସେମାନେ ଚୋରି ବାଇକ ବ୍ୟବହାର କରୁଥିବା ପୋଲିସ ଜାଣିବାକୁ ପାଇଥିଲା ।
ସେମାନେ ଭୁବେନେଶ୍ୱର ଏବଂ ଅନ୍ୟାନ୍ୟ ସ୍ଥାନରୁ ବାଇକ ଚୋରି କରିବା ପରେ ଗୋପାଳପୁର ଥାନା ଗୋଲାବନ୍ଧ ଠାରେ ବାଇକଗୁଡିକୁ ରଖୁଥିବା ପୋଲିସ ଜାଣିବାକୁ ପାଇଥିଲା । ଗିରଫ ଅଭିଯୁକ୍ତ ଦ୍ୱୟ ହେଲେ ଖୋର୍ଦ୍ଧାର ଗୋଲାମ ହୁସେନ ଖାନ ଓରଫ ପପୁ (୪୩), ଲୋଚାପଡା ବାସୁଦେବନଗର ୭ମ ଗଳିର ଲିଲୁ ବେହେରା (୨୨)। ହୁସେନର ଘର ଖୋର୍ଦ୍ଧା ଜିଲ୍ଲାରେ ହୋଇଥିବା ବେଳେ ସେ ଗୋଲାବନ୍ଧ ଆର୍ମି ଏଡ଼ କଲେଜ ନିକଟରେ ରହୁଥିଲା ।
