ବୌଦ୍ଧ: ବୌଦ୍ଧ ଜିଲାରେ ତୁରନ୍ତ ବନ୍ଦୋବସ୍ତ ଓ ଚକବନ୍ଦୀ କୋର୍ଟ କାର୍ଯ୍ୟକ୍ଷମ ହେବାକୁ ଯାଉଥିବା ଜଣାଯାଇଛି । ଏନେଇ ରାଜ୍ୟ ସରକାରଙ୍କ ପକ୍ଷରୁ ବିଧିବଦ୍ଧ ଭାବରେ ବିଜ୍ଞପ୍ତି ପ୍ରକାଶ ପାଇଛି । ବ୍ରହ୍ମପୁର ରାଜସ୍ୱ ଆୟୁକ୍ତଙ୍କ କାର୍ଯ୍ୟାଳୟ ଚିଠି ନମ୍ବର ୧୭୯୬ ତା ୨୭.୧୦.୨୦୨୨ରିଖରେ ବୌଦ୍ଧ ଜିଲାପାଳଙ୍କୁ ତୁରନ୍ତ ଏହି କୋର୍ଟ କାର୍ଯ୍ୟକ୍ଷମ କରିବାକୁ ଆନୁସଙ୍ଗିକ ବ୍ୟବସ୍ଥା ଯୋଗାଇଦେବାକୁ ନିର୍ଦ୍ଦେଶ ଦିଆଯାଇଛି । ରାଜ୍ୟ ସରକାରଙ୍କ ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗ ଚିଠି ନମ୍ବର ୩୫୨୮୦/ ତା ୧୭.୧୦.୨୦୨୨ ଅନୁଯାୟୀ ବୌଦ୍ଧ ଓ ନୂଆପଡା ଜିଲା ପାଇଁ ବରିଷ୍ଠ ପ୍ରଶାସନିକ ଅଧିକାରୀ ବୀରସେନ ପ୍ରଧାନଙ୍କୁ ବନ୍ଦୋବସ୍ତ ଓ ଚକବନ୍ଦୀ ଅତିରିକ୍ତ କମିଶନର ଭାବରେ ନିଯୁକ୍ତି ଦିଆଯାଇଛି ।
ବର୍ତ୍ତମାନ ଶ୍ରୀପ୍ରଧାନ ଉଭୟ ଜିଲାରେ ନିର୍ଦ୍ଧାରିତ ଦିବସରେ କୋର୍ଟ କାର୍ଯ୍ୟ ଚାଲୁରଖିବା ସହିତ ମାମଲା ଗୁଡିକର ଶୁଣାଣି କରିବେ ବୋଲି ଜଣାପଡିଛି । ଅତିରିକ୍ତ କମିଶନର ଶ୍ରୀ ପ୍ରଧାନ ସୋମବାର ବୌଦ୍ଧରେ ପହଞ୍ଚି କୋର୍ଟ କାର୍ଯ୍ୟକ୍ଷମ ପାଇଁ ଆବଶ୍ୟକୀୟ ସୁବିଧା ଯୋଗାଇଦେବାକୁ ଜିଲାପାଳ ସତ୍ୟରଞ୍ଜନ ସାହୁ ଓ ଅତିରିକ୍ତ ଜିଲାପାଳ ବବିତାରାଣୀ ଦଳବେହେରାଙ୍କ ସହିତ ଆଲୋଚନା କରିଛନ୍ତି । ବର୍ତ୍ତମାନ ଅନେକ ଜମିବାଡିର ବନ୍ଦୋବସ୍ତ ଓ ଚକବନ୍ଦୀ ମାମଲା ପାଇଁ ସମ୍ବଲପୁର ଓ ବଲାଙ୍ଗୀର ଯିବାକୁ ପଡୁଥିବାବେଳେ ସାଧାରଣଲୋକଙ୍କୁ ଅଧିକ ଖର୍ଚ୍ଚାନ୍ତ ହେବାକୁ ପଡୁଥିଲା । ତିନିଦିନ ମଧ୍ୟରେ ବୌଦ୍ଧର ବନ୍ଦୋବସ୍ତ ଓ ଚକବନ୍ଦୀର ସମସ୍ତ ଜମିବାଡି ମାମଲାର ଫାଇଲ ଅତିରିକ୍ତ କମିଶନର ଶ୍ରୀପ୍ରଧାନଙ୍କ ପ୍ରତ୍ୟକ୍ଷ ତତ୍ୱାବଧାନରେ ବୌଦ୍ଧକୁ ସ୍ଥାନାନ୍ତର କରାଯିବ ବୋଲି ଜଣାପଡିଛି । ଏହି କୋର୍ଟ ଜିଲାପାଳଙ୍କ କାର୍ଯ୍ୟାଳୟ ପରିସରରେ ନିର୍ଦ୍ଧାରିତ ଦିବସରେ କାର୍ଯ୍ୟକରିବ ବୋଲି ଜଣାପଡିଛି ।
Comments are closed.