ବୌଦ୍ଧ: ରାଜ୍ୟରେ ବିଭିନ୍ନ ଅନୁସୁଚତି ଜାତି ଓ ଜନଜାତି ଲୋକ ଶୋଷିତ ହେଉଥିବା ସହ ନ୍ୟାୟ ପାଉନଥିବା ନେଇ ବୁଧବାର ଦିନ ବୌଦ୍ଧ ବିଜେପି ଅନୁସୁଚତି ଜାତି ମୋର୍ଚ୍ଚା ପକ୍ଷରୁ ଅଭିଯୋଗ କରାଯିବା ସହ ନ୍ୟାୟ ପାଇଁ ଜିଲାପାଳଙ୍କ କାର୍ଯ୍ୟାଳୟ ଆଗରେ ବିକ୍ଷୋଭ ପ୍ରଦର୍ଶନ କରିଛନ୍ତି। କିଛି ଦିନ ତଳେ କେନ୍ଦ୍ରାପଡା ଜିଲା ଆଳି ନିର୍ବାଚନ ମଣ୍ଡଳୀର ବାଳକାଟି ଗ୍ରାମର ହରିଶ ମଲିକ ତାଙ୍କ ବାଳକାଟି ପଞ୍ଚାୟତରେ ହୋଇଥିବା ଦୁର୍ନୀତି ନେଇ ବିଭିନ୍ନ ସମାଜିକ ଗଣମାଧ୍ୟମରେ ପ୍ରକାଶ କରିଥିଲେ। ଗତ ଜୁଲାଇ ୧ ତାରିଖରେ ତାଙ୍କ ପରିବାର ଲୋକଙ୍କୁ ଶାସକ ଦଳର ନେତାଙ୍କ ପ୍ରରୋଚନାରେ ସ୍ଥାନୀୟ ସରପଞ୍ଚ ଓ ସମର୍ଥକମାନେ ମାଡ ମାରିଥିବା ଅଭିଯୋଗ କରିଥିଲେ। କିନ୍ତୁ ଏନେଇ ପୋଲିସ ପାଖରେ ଦ୍ୱାରସ୍ଥ ହୋଈଥିଲେ ମଧ୍ୟ କୌଣସି ପଦକ୍ଷେପ ନିଆଯାଉନଥିବାରୁ ବିଜେପି ପକ୍ଷରୁ ଅଭିଯୋଗ କରାଯାଇଛି।
ଏନେଇ ବୌଦ୍ଧ ବିଜେପି ଅନୁସୁଚତି ଜାତି ମୋର୍ଚ୍ଚା ସଭାପତି ରାଜୀବ ଦେହୁରୀଙ୍କ ନେତୃତ୍ୱରେ ବିଜେପି ପକ୍ଷରୁ ଏକ ରାଲି କରି ଜିଲାପାଳଙ୍କ କାର୍ଯ୍ୟାାଳୟ ଆଗରେ ବିକ୍ଷୋଭ ପ୍ରଦର୍ଶନ କରିଥିଲେ। ଏହି ଘଟଣାରେ ଜଡିତ ଥିବା ସମସ୍ତ ଅଭିଯୁକ୍ତମାନଙ୍କୁ ଗିରଫ କରିବାକୁ ଦାବୀ କରିଥିଲେ। ଏହା ସହ ଏକ ଦାବୀ ପତ୍ର ଜିଲାପାଳଙ୍କ ଜରିଆରେ ମହାମହିମ ରାଜ୍ୟପାଳଙ୍କ ପାଖକୁ ପଠାଇଥିଲେ।
