କଲମପୁର : ଶୁକ୍ରବାର ବିଳମ୍ବିତ ରାତିରେ ଗାଁ କୁ ପହଂଚିଲା ଦୁଇ ଯୁବ ଦାଦନଙ୍କ ମୃତଦେହ। ଶୋକାକୁଳ ପରିବେଶ ମଧ୍ୟରେ ଶନିବାର ସକାଳେ ଗୋଟିଏ ଜୁଇରେ ଜଳିଲା ଦୁଇ ଜଣଙ୍କ ମୃତଦେହ।
ସୂଚନାଯୋଗ୍ୟ ଯେ, କଳାହାଣ୍ଡି ଜିଲା ଦୁର୍ଗମ ଅଂଚଳ ଭାବେ ପରିଚିତ ଥୁଆମୁଳ ରାମପୁର ବ୍ଲକ ଅଧିନସ୍ଥ ଗୋପିନାଥପୁର ପଞ୍ଚାୟତ ଅନ୍ତର୍ଗତ ପେରଗୁନି ପଡାର ବହୁ ଯୁବକଙ୍କ ସମେତ ବେନାଦାର ମାଝୀଙ୍କ ପୁଅ ମନୋହର (୨୩) ଓ ଦାହା ମାଝୀଙ୍କ ପୁଅ ଉପେନ୍ଦ୍ର (୨୦), ଆନ୍ଧ୍ରପ୍ରଦେଶର ହାଇଦ୍ରାବାଦ କୁମ୍ପୁଲିକୁ ଗତ ତିନିମାସ ତଳେ କିଛି ରୋଜଗାର କରିବା ଆଶାରେ ଯାଇଥିଲେ। ସେଠାରେ ଫାୟାର ଫିଲ୍ଡ ନାମକ ଏକ କନଷ୍ଟ୍ରକସନ୍ କମ୍ପାନୀରେ କାମ କରୁଥିଲେ। ଗତ ମଙ୍ଗଳବାର ଦିନ କାମ କରୁଥିବା ବେଳେ କମ୍ପାନିର ଏକ ଏକ ଛଡ ବୋଝେଇ ଟ୍ରଲି ଓଲଟି ପଡିବାରୁ ତଳେ ଥିବା ଶ୍ରମିକଙ୍କ ଉପରେ ଅଜାଡି ହେଇ ପଡିଥିଲା। ସେହି ତଳେ ମନୋହର ଓ ଉପେନ୍ଦ୍ର ଥିଲେ। ଲୁହା ଛଡ ପଡିବାରୁ ସେମାନଙ୍କ ଘଟଣାସ୍ଥଳରେ ମୃତ୍ୟୁ ହେଇଥିଲା। ଏନେଇ କମ୍ପାନୀ ତରଫରୁ ତୁରନ୍ତ ବସିରାବାଦ ପୁଲିସ ଷ୍ଟେସନରେ ଲିଖିତ ଅଭିଯୋଗ ପରେ ମୃତଦେହ ଜବତ କରିବା ସହ ସ୍ଥାନୀୟ ଗାନ୍ଧି ହସ୍ପିଟାଲରେ ବ୍ୟବଚ୍ଛେଦ କରାଯାଇଥିଲା। ଶୁକ୍ରବାର ବିଳମ୍ବିତ ରାତିରେ ଏକ ଆମ୍ବୁଲେନ୍ସ ଯୋଗେ ପେରଗୁନିପଡାକୁ ମୃତଦେହ ପହଂଚିବା ପରେ ଶୋକାକୁଳ ପରିବେଶରେ ଉଭୟ ଯୁବକଙ୍କ ମୃତଦେହକୁ ଗୋଟିଏ ଜୁଇରେ ଜଳାଯାଇଛି।
