ନୂଆଦିଲ୍ଲୀ: ଆସନ୍ତା ଜୁନ ୫ ତାରିଖରେ ଭାରତୀୟ ଜନତା ପାର୍ଟି (ବିଜେପି) ଦୁଇଫାଳ ହୋଇଯିବ। ନରେନ୍ଦ୍ର ମୋଦୀ ଆଉ ଦେଶର ପ୍ରଧାନମନ୍ତ୍ରୀ ରହିବେ ନାହିଁ। ଏଭଳି ମନ୍ତବ୍ୟ ଦେଇଛନ୍ତି ଶିବ ସେନା (ୟୁବିଟି) ମୁଖ୍ୟ ଉଦ୍ଧବ ଠାକରେ। ନାସିକ୍ରେ ଏକ ନିର୍ବାଚନୀ ରାଲିରେ ପ୍ରଚାର ସମୟରେ ଉଦ୍ଧବ ଏଭଳି ମନ୍ତବ୍ୟ ଦେବା ସହିତ ୨୦୧୪ ଏବଂ ୨୦୧୯ ଲୋକସଭା ନିର୍ବାଚନରେ ମୋଦୀଙ୍କ ପାଇଁ ଭୋଟ ମାଗି ଭୁଲ କରିଥିବା କହିଛନ୍ତି। ଏଥିପାଇଁ ସେ କ୍ଷମାପ୍ରାର୍ଥନା ମଧ୍ୟ କରିଛନ୍ତି।
ଶିବସେନା (ୟୁବିଟି) କଂଗ୍ରେସ ସହିତ ମିଶିଯିବ ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମନ୍ତବ୍ୟ ଦେବା ପରେ ଉଦ୍ଧବ ଏଭଳି ପ୍ରତିକ୍ରିୟା ପ୍ରକାଶ କରିଛନ୍ତି। ମୋଦୀ ପ୍ରଧାନମନ୍ତ୍ରୀ ଭାବେ ଦାୟିତ୍ଵ ନେବା ସମ୍ପର୍କିତ ଏକ ପ୍ରଶ୍ନର ଉତ୍ତର ଦେଇ ଉଦ୍ଧବ କହିଥିଲେ ଯେ, ଆମେ କଂଗ୍ରେସରେ ମିଶିଯିବୁ ବୋଲି ଯେତେବେଳେ ପ୍ରଧାନମନ୍ତ୍ରୀ କହୁଛନ୍ତି, ତା’ହେଲେ ବିଜେପିକୁ ନେଇ ଆମେ ଅଧିକ ଚିନ୍ତିତ ଅଛୁ। ୩୦ ବର୍ଷ ବିଜେପି ସହିତ ରହି କାମ କରିଛୁ, କିନ୍ତୁ ସେହି ଦଳରେ କେବେ ମିଶିନାହୁଁ। ଦେଶର ଜନତାମାନେ ନିଷ୍ପତ୍ତି ନେଇସାରିଛନ୍ତି ଯେ, ଜୁନ ୫ରେ ମୋଦୀ ଭାରତର ପୂର୍ବତନ ପ୍ରଧାନମନ୍ତ୍ରୀ ହୋଇଯାଇଥିବେ। ତେଣୁ ତାଙ୍କ ଦଳର ଅବସ୍ଥା କ’ଣ ହେବ ? ଦଳରେ ସେହିଦିନ ଫାଟ ସୃଷ୍ଟି ହୋଇଯିବ।
Comments are closed.