ନୂଆଦିଲ୍ଲୀ : ଦିଲ୍ଲୀରେ ଏକ ଚକିତ କରିଦେବା ଭଳି ଘଟଣା ସାମ୍ନାକୁ ଆସିଛି । ଜଣେ ନବମ ଶ୍ରେଣୀ ଛାତ୍ର ନିଜ ପ୍ରେମିକାକୁ ଜନ୍ମଦିନରେ ଆଇଫୋନ୍ ଉପହାର ଦେବା ପାଇଁ ନିଜ ମା’ଙ୍କ ସୁନା ଗହଣା ଚୋରି କରିବା ଅଭିଯୋଗରେ ଗିରଫ ହୋଇଛି । ନଜଫଗଡ ଅଞ୍ଚଳରେ ଏହି ଘଟଣା ଏବେ ସମସ୍ତଙ୍କ ଧ୍ୟାନ ଆକର୍ଷଣ କରୁଛି । ସୂଚନା ଅନୁସାରେ ଛାତ୍ର ଜଣକ ପ୍ରଥମେ ନିଜ ମା’ଙ୍କୁ ଆଇଫୋନ୍ କିଣିବା ପାଇଁ ପଇସା ମାଗିଲା । କିନ୍ତୁ ମା ମନା କରିଦେଲେ । ନିକଟରେ ଛାତ୍ରଙ୍କ ପିତାଙ୍କ ମୃତ୍ୟୁ ହୋଇଥିଲା । ମା’ ମନା କରିବା ପରେ ସେ ମାଙ୍କ ସୁନା ଗହଣା ଚୋରି କରିବା ପାଇଁ ନିଷ୍ପତ୍ତି ନେଲା । ସେଦିନ ରାତିରେ ସେ ଗହଣା ଚୋରି କରିଦେଲା ।
ଦିନେ ମହିଳାଙ୍କୁ ତାଙ୍କ ସୁନା ଚେନ୍ ଏବଂ ମୁଦି ନମିଳିବା ପରେ ଚୋରି ହୋଇଯାଇଥିବା ଜାଣିବାକୁ ପାଇଲେ । ଏହା ପରେ ସେ ଥାନାକୁ ଯାଇ ଅଭିଯୋଗ କଲେ । ପୁଲିସ ସିସିଟିଭି ଆଧାରରେ ଖୋଳତାଡ କରି ଜାଣିବାକୁ ପାଇଲା କି ଏଥିରେ କୌଣସି ବାହାର ଲୋକର ଭୂମିକା ନାହିଁ । କିନ୍ତୁ ପରେ ସବୁ ସତ ଜଣାପଡିଲା । ଛାତ୍ର ଜଣକ ୫୦ ହଜାର ଟଙ୍କା ଆଇଫୋନ୍ କିଣିବା ପାଇଁ ଏହି ଗହଣା ଚୋରି କରିଥିଲା । ସେ ନିଜ ପ୍ରେମିକାକୁ ଜନ୍ମଦିନରେ ଉପହାର ଦେବା ପାଇଁ ଆଇଫୋନ୍ କିଣିଲା । ପୁଲିସ ଛାତ୍ରଠୁ ଆଇଫୋନ୍ ଜବତ କରିବା ସହ ଅଟକ ରଖି ପଚରାଉଚରା କରୁଛି ।
