ମୁମ୍ବଇ : ପିଏମ୍ ମୋଦୀଙ୍କ ବାୟୋପିକର ଶୁଟିଂ ସମୟରେ ଅଭିନେତା ବିବେକ ଓବରୟ ଆହତ ହୋଇଛନ୍ତି। ସୂଚନା ଅନୁସାରେ, ଉତ୍ତରାଖଣ୍ଡର ଉତ୍ତରକାଶୀ ଜିଲାରେ ଏକ ସିନ୍ ର ଶୁଟିଂ ସମୟରେ ସେ ଖାଲି ପାଦରେ ଗଙ୍ଗାଘାଟ ନିକଟରେ ବରଫ ଉପରେ ଚାଲୁଥିଲେ। ସେହି ସମୟରେ ତାଙ୍କ ଗୋଡ଼ରେ ଗଭୀର ଆଘାତ ଲାଗିଥିଲା। ତଳେ ପଡ଼ିଥିବା କୌଣସି ଏକ ଧାରୁଆ ଜିନିଷ ଦ୍ୱାରା ତାଙ୍କ ପାଦରେ କ୍ଷତ ସୃଷ୍ଟି ହୋଇଥିଲା। ଏହାପରେ ତୁରନ୍ତ ତାଙ୍କୁ ଡାକ୍ତରଙ୍କ ପାଖକୁ ନିଆ ଯାଇଥିଲା। ଡାକ୍ତର ସେଠାରେ ତାଙ୍କ ଗୋଡ଼ରେ ଷ୍ଟିଚ୍ ପକାଇ ପଟି ବାନ୍ଧିଥିଲେ। ତେବେ ଶୁଟିଂ ସେଟରେ ଉପସ୍ଥିତ ଥିବା ତାଙ୍କ ୟୁନିଟ୍ ର ସଦସ୍ୟଙ୍କ କହିବା ଅନୁସାରେ, ବିବେକ ଏବେ ଠିକ୍ ଅଛନ୍ତି ଓ ଖୁବଶୀଘ୍ର ପୁଣି ସେ ଶୁଟିଂ କାର୍ଯ୍ୟ ଆରମ୍ଭ କରିଦେବେ।
ବିଶେଷ ସୂତ୍ରରୁ ପ୍ରକାଶ ଯେ, ଚଳଚ୍ଚିତ୍ରର ଅନେକ ଗୁରୁତ୍ୱପୂର୍ଣ୍ଣ ଭାଗରେ ମୋଦୀଙ୍କ ପିଲାଦିନର ଜୀବନ ଓ ରାଜନୈତିକ ଯାତ୍ରାକୁ ବାସ୍ତବ ରୂପେ ଦର୍ଶାଇବାକୁ ଚେଷ୍ଟା କରାଯାଉଛି। ଏହି ସିନ୍ ଗୁଡ଼ିକୁ ଗଙ୍ଗା ଘାଟ, କଳ୍ପ କେଦାର ମନ୍ଦିର, ମୁଖବା ଗାଁକୁ ସଂଯୋଗ କରୁଥିବା ପୋଲ ଉପରେ ଶୁଟ୍ କରାଯିବ।
