ଭୁବନେଶ୍ୱର: ବାତ୍ୟା ‘ଅସାନି’କୁ ନେଇ ମତ୍ସ୍ୟଜୀବୀଙ୍କ ପାଇଁ କଠୋର ହେଲେ ଏସଆରସି । ୧୨ ତାରିଖ ପର୍ଯ୍ୟନ୍ତ ସମୁଦ୍ର ଭିତରକୁ ନଯିବାକୁ ମତ୍ସ୍ୟଜୀବୀଙ୍କୁ ଏସଆରସି ନିର୍ଦ୍ଦେଶ ଦେଇଛନ୍ତି । ନିର୍ଦ୍ଦେଶ ଅନୁଯାୟୀ ଯଦି କୌଣସି ମତ୍ସ୍ୟଜୀବୀ ଅମାନ୍ୟ କଲେ ତେବେ ବିପର୍ଯ୍ୟୟ ଆଇନରେ ସେମାନଙ୍କ ଉପରେ କାର୍ଯ୍ୟାନୁଷ୍ଠାନ ହେବ ବୋଲି ସୂଚନା ଦେଇଛନ୍ତି ଏସଆରସି । ବାରଣ ସତ୍ତ୍ବେ କିଛି ମତ୍ସ୍ୟଜୀବୀ ସମୁଦ୍ର ଭିତରକୁ ଯାଇଥିବାରୁ ଏପରି ନିଷ୍ପତ୍ତି ନିଆଯାଇଥିବା କୁହାଯାଇଛି ।
ସୂଚନା ଥାଉ କି ଆଜି ସକାଳେ ଛତ୍ରପୁର ନିକଟସ୍ଥ ଆର୍ଯ୍ୟପଲ୍ଲୀ ସମୁଦ୍ରରେ ବଡ଼ ଧରଣର ଅଘଟଣ ଘଟିଥିଲା । ସମୁଦ୍ର ଭିତରକୁ ମାଛ ମାରି ଯାଇଥିବା ବେଳେ ୬୦ଜଣ ମତ୍ସ୍ୟଜୀବୀ ଅଳ୍ପକେ ବର୍ତ୍ତି ଯାଇଥିଲେ । ୬୦ଜଣ ଯୁବକ ୬ଟି ଡଙ୍ଗା ଯୋଗେ ମାଛ ମାରିବାକୁ ସମୁଦ୍ର ଭିତରକୁ ଯାଇଥିବା ବେଳେ ଡଙ୍ଗା ଓଲଟି ପଡ଼ିବା ଫଳରେ ମତ୍ସ୍ୟଜୀବୀ ମାନେ ପହଁରି ପହଁରି କୂଳରେ ଆସି ପହଞ୍ଚିଥିଲେ । ହେଲେ ସମୁଦ୍ର ପାଣିରେ ମତ୍ସ୍ୟଜୀବୀଙ୍କ ଜାଲ, ଡଙ୍ଗା ଓ ମାଛ ଭାସିଯାଇଛି ।
