ଭବାନିପାଟଣା: ଇନ୍ଦ୍ରାବତୀ ଦକ୍ଷିଣ ମୁଖ୍ୟ କେନାଲର ଆର୍ଡି ୪୭ ନିକଟରେ ମୁଖ୍ୟ କେନାଲର ଗୁର୍ଜିଗୁଡ଼ା ଗାଁ ନିକଟ ସାଇଫନର ମଝି ଅଂଶ ଭାଙ୍ଗି ଯାଇଛି । ସେହି ନିକଟ ସବ ମାଇନର କେନାଲ ରେ ମଧ୍ୟ ଘାଇ ସୃଷ୍ଟି ହୋଇଛି। ଫଳରେ ଉଭୟ କେନାଲରୁ ପାଣି ନିଷ୍କାସନ ହୋଇ ବ୍ୟାପକ ଅଞ୍ଚଳ ଜଳମଗ୍ନ ହେଇଛି। ଉଲ୍ଲେଖଯୋଗ୍ୟ ଯେ ଗତ ୭ ତାରିଖ ଦିନ ଖରିଫ୍ ଚାଷ ପାଇଁ ଇନ୍ଦ୍ରାବତୀ ପ୍ରକଳ୍ପର ବାମ ଏବଂ ଦକ୍ଷିଣ ମୁଖ୍ୟ କେନାଲରେ ପାଣି ଛଡା ଯାଇଥିଲା। ତାହାର ୪୮ ଘଣ୍ଟା ନ ପୁରୁଣୁ ଦକ୍ଷିଣ ମୁଖ୍ୟ କେନାଲରେ ସାଇଫନ ଭାଙ୍ଗିଛି ଏବଂ ଘାଇ ସୃଷ୍ଟି ହୋଇଛି। ଏହା ସହିତ ମୁଖ୍ୟ କେନାଲରୁ ଗୁର୍ଜିଗୁଡ଼ା ଗାଁ ଆଡ଼କୁ ଯାଇଥିବା ସବ ମାଇନର କେନାଲରେ ମଧ୍ୟ ଘାଇ ସୃଷ୍ଟି ହେଇଛି। ଫଳରେ ବ୍ୟାପକ ଅଞ୍ଚଳ ଜଳମଗ୍ନ ହୋଇଛି। ଆଜି ଭୋରରୁ ଦିନ ଗୋଟାଏ ଯାଏଁ ପାଣି ଚାଲିଛି। ଫଳରେ ମଙ୍ଗଳପୁର ବ୍ୟରେଜରେ ଫାଟକ ବନ୍ଦ କରାଯାଇଥିବା ବିଭାଗୀୟ କନିଷ୍ଠ ଯନ୍ତ୍ରୀ ପ୍ରକାଶ କରିଛନ୍ତି।
ଉଲ୍ଲେଖଯୋଗ୍ୟ ଯେ ରକ୍ଷଣାବେକ୍ଷଣ ଅଭାବରୁ କେନାଲ ବାରମ୍ବାର ଭାଙ୍ଗୁଥିବାରୁ ଦକ୍ଷିଣ ମୁଖ୍ୟ କେନାଲର ଆରଡି ୦୦ କିମି ଠାରୁ ଆର ଡି ୪୧ କିମି ପର୍ଯ୍ୟନ୍ତ ପ୍ରାୟ ୧୪୯ କୋଟି ଟଙ୍କା ବ୍ୟୟ ଅଟକଳରେ ଲାଇନିଙ୍ଗ ଓ ମରାମତି କାମ ଚାଲିଛି । ଆସନ୍ତା ରବି ଋତୁରେ ଏହି କାମ ସରିବା ପରେ ଆରଡି ୪୭ରୁ କେନାଲ ଶେଷ ମୁଣ୍ଡକୁ ପ୍ରାୟ ୨୨୨ କୋଟି ଟଙ୍କା ବ୍ୟୟରେ କେନାଲ ମରାମତି କରାଯିବାକୁ ଲକ୍ଷ୍ୟ ଧାର୍ଯ୍ୟ ହୋଇଛି। ତେବେ କେନାଲରେ ପାଣି ଛଡା ଯିବାର ୪୮ ଘଣ୍ଟା ନ ପୁରୁଣୁ କେନାଲରେ ଘାଇ ସୃଷ୍ଟି ହେଇଥିବାରୁ ଆଗକୁ ଖରିଫ୍ ଚାଷ ବେଳେ ସମସ୍ୟା ଦେଖାଦେବାର ଆଶଙ୍କା ରହିଛି।
