ଡେସ୍କ: ଭାଇରାଲ ହେବା ଚକ୍କରରେ ଆଜିକାଲି ଯିଏ ଯେମିତି ଭାବୁଛି ରିଲସ ତିଆରି କରି ଇଣ୍ଟରନେଟରେ ଅପଲୋଡ଼ କରୁଛି। ଏମିତି ଅନେକ ଭିଡିଓ ରହିଛି ଯାହା ବାସ୍ତବରେ ସମାଜକୁ ଭିନ୍ନ ବାର୍ତ୍ତା ଦେଉଛି ଓ ସେଥିପାଇଁ ଲୋକମାନେ ସେଗୁଡିକୁ ପସନ୍ଦ କରୁଛନ୍ତି ଓ ଲାଇକ ଏବଂ ଫଲୋ ମଧ୍ୟ କରୁଛନ୍ତି। ହେଲେ ଇଣ୍ଟରନେଟରେ ଏମିତି ବି କିଛି ଭିଡିଓ ଭାଇରାଲ ହେଉଛି ଯାହା ଲୋକଙ୍କ ପସନ୍ଦ ତ ଦୂରର କଥା, ଅଦାଲତରେ ମାମଲା ପହଂଚି ଯାଉଛି ଓ କେତେକ କ୍ଷେତ୍ରରେ କୋର୍ଟ ମଧ୍ୟ ଦଣ୍ଡବିଧାନ କରୁଛନ୍ତି।
ଏମିତି ଏକ ଘଟଣା ଘଟିଛି ମଧ୍ୟପ୍ରଦେଶର ଜବଲପୁରରେ। ମଧ୍ୟପ୍ରଦେଶ କୋର୍ଟଙ୍କ ରାୟ ପରେ ଘଟଣା ଆହୁରି ରୋଚକ ମୋଡ଼ ନେଇଛି। ସୂଚନା ଅନୁଯାୟୀ, ମଧ୍ୟପ୍ରଦେଶ ଜବଲପୁରର ଫୈଜଲ ନିଶାର ନାମକ ଜଣେ ବ୍ୟକ୍ତି ଭାଇରାଲ ହେବା ଉଦ୍ଦେଶ୍ୟ ରଖି ‘ପାକିସ୍ତାନ ଜିନ୍ଦାବାଦ…ଭାରତ ମୁର୍ଦ୍ଦାବାଦ’ କହିଥିବା ଏକ ଭିଡିଓ ସାମାଜିକ ଗଣମାଧ୍ୟମରେ ଅପଲୋଡ଼ କରିଥିଲେ। ସମ୍ପୃକ୍ତ ଭିଡିଓଟି ସାମାଜିକ ଗଣମାଧ୍ୟମରେ ଖୁବ କମ ସମୟ ମଧ୍ୟରେ ଭାଇରାଲ ମଧ୍ୟ ହୋଇଥିଲା।
ଭାବିଥିଲେ ଭାଇରାଲ ହେବେ, ହେଲେ ଫସିଗଲେ ଯୁବକ pic.twitter.com/63cKjHMfH6
— Samaja Live (@samajalive) October 22, 2024
ଏହି ଘଟଣାରେ ଯେଉଁମାନେ ତାଙ୍କ ଭିଡିଓ ଦେଖୁଥିଲେ ସେମାନେ ଫୈଜଲକୁ ଗାଳିଗୁଲଜ କରିବା ଆରମ୍ଭ କରିଦେଇଥିଲେ। ଘଟଣା ଯାଇ ପହଞ୍ଚିଥିଲା ପୁଲିସ ପାଖରେ।ପରେ ପୁଲିସ ଫୈଜଲଙ୍କୁ ଗିରଫ କରି କୋର୍ଟ ଚାଲାଣ କରିଥିଲା। ଏହି ଘଟଣାରେ ଜାମିନ ପାଇଁ ମଧ୍ୟପ୍ରଦେଶ ହାଇକୋର୍ଟରେ ଆବେଦନ କରିଥିଲା ଫୈଜଲ। କୋର୍ଟ କିନ୍ତୁ ଜାମିନ ବାବଦକୁ ଅର୍ଥ କି ଆଉକିଛି ସର୍ତ୍ତ ରଖିନଥିଲେ। କୋର୍ଟ କହିଥିଲେ ଯେ ଫୈଜଲକୁ ଜବଲପୁର ଥାନା ପରିସରରେ ଥିବା ତ୍ରିରଙ୍ଗାକୁ ସଲାମ କରିବା ସହ ୨୧ ଥର ଭାରତ ମାତା ଜୟ କହିବାକୁ ପଡିବ। ତାହା ହିଁ ହୋଇଥିଲା, ଅଭିଯୁକ୍ତ ଫୈଜଲ ତ୍ରିରଙ୍ଗାକୁ ସଲାମ କରିବା ସହ ୨୧ ଥର ଭାରତ ମାତା କି ଜୟ କହିଥିଲେ। ସେ ଆଗକୁ ମଧ୍ୟ ଏଭଳି ଭୁଲ କରିବେ ନାହିଁ ବୋଲି କୋର୍ଟଙ୍କୁ ଜଣାଇଥିଲେ।
