ଗୋପାଳପୁର: ବ୍ରହ୍ମପୁର ବନଖଣ୍ଡ ପକ୍ଷରୁ ଗୋଳନ୍ଥରା ଥାନା ଅନ୍ତର୍ଗତ ଝାଟିପଦର ପଞ୍ଚାୟତ ଅଫିସ ନିକଟରୁ ଏକ ଗାଡି ସହିତ ବିପୁଳ ପରିମାଣର କାଠଳଜବତ କରାଯାଇଛି । ସୂଚନା ମୁତାବକ ବ୍ରହ୍ମପୁର ବନଖଣ୍ଡ ଅଧିକାରୀ ସନି ଖୋଖରଙ୍କ ନିର୍ଦେଶକ୍ରମେ ବ୍ରହ୍ମପୁର ବନାଞ୍ଚଳ ଓ ବନଖଣ୍ଡର ଭିଜିଲାନ୍ସ ଟିମ ରାତି ପାଟ୍ରୋଲିଂ କରୁଥିଲେ । ଏହି ସମୟରେ ଝାଟିପଦର ନିକଟରେ ଏକ ଗାଡି କାଠ ନେଇ ଯାଉଥିବାର ଦେଖିଥିଲେ । ଉକ୍ତ ଗାଡିକୁ ଅଟକାଇବା ପାଇଁ ଚେଷ୍ଟା କରିବା ସମୟରେ ଚାଳକ ଜଣଙ୍କ ଗାଡି ଛାଡି ଫେରାର ହୋଇଯାଇଥିଲେ । ସେଠାରୁ ଗୋଟିଏ ଗାଡି (ଏପି ୩୦ ଡବ୍ଲୁ ୧୭୨୭) ସମେତ ୩୩ ଘନପୁଟ ବିଭିନ୍ନ ଦାମୀ କାଠକୁ ଜବତ କରିଛନ୍ତି ।
ଏହି ଚଢାଉରେ ଟାମଣା ବନପାଳ ରୁପକ ପ୍ରଧାନ, ଭିଜିଲାନ୍ସ ୱିଙ୍ଗର ବନପାଳ ଏନ ବାଲାଜି, ବ୍ରହ୍ମପୁର ବନପାଳ ବାବୁ ସେଠୀଙ୍କ ସମେତ ବନରକ୍ଷୀ ଉମା ପାତ୍ର, ଜୟକୃଷ୍ଣ ବେହେରାଙ୍କ ସମେତ ବହୁ ବନକର୍ମଚାରୀ ସାମିଲ ଥିଲେ । ଜବତ କାଠର ଆନୁମାନିକ ବଜାର ମୁଲ୍ୟ ୨ ଲକ୍ଷ ଟଙ୍କାରୁ ଉର୍ଦ୍ଧ ହୋଇଥିବା ଆକଳନ କରାଯାଇଛି। ଏ ନେଇ ୧୩/୨୦୨୨-୨୩ ରେ ଏକ ମାମଲା ରୁଜୁ କରାଯାଇଥିବା ବେଳେ ଅଧିକ ତଦନ୍ତ ଜାରି ରହିଥିବା ବ୍ରହ୍ମପୁର ବନାଞ୍ଚଳ ଅଧିକାରୀ ରଜତ କୁମାର ମିଶ୍ର ସୂଚନା ଦେଇଛନ୍ତି।
