ଶିବଲିଙ୍ଗରେ ବେଲ ପତ୍ର ଚଢାଇବା ଦ୍ବାରା ପ୍ରଭୁ ଭୋଳାଶଙ୍କର ସନ୍ତୁଷ୍ଟ ହୋଇଥାଆନ୍ତି। ଶ୍ରାବଣ ମାସରେ ବେଲ ପତ୍ର ଚଢାଇବା ଦ୍ବାରା ପ୍ରଭୁ ଭକ୍ତଙ୍କର ସମସ୍ତ ମନୋକାମନା ଶୀଘ୍ର ପୂର୍ଣ୍ଣ କରିଥାଆନ୍ତି। ମାନ୍ୟତା ରହିଛି ଯେ, ଭଗବାନ ଶିବଙ୍କୁ ବେଲପତ୍ର ଚଢାଇବା ଦ୍ବାରା ତାଙ୍କର ମସ୍ତିଷ୍କ ଶୀତଳ ରହିଥାଏ। ଯାହାଦ୍ବାରା ସେ ଭକ୍ତଙ୍କ ଉପରେ ପ୍ରସନ୍ନ ହୋଇ ଯାଆନ୍ତି।
ବେଲପତ୍ର ତୋଳିବାର କିଛି ନିୟମ ରହିଛି। ଆସନ୍ତୁ ଜାଣିବା ସେ ସବୁ କ’ଣ ..
ଏହି ତିଥିରେ ବେଲପତ୍ର ଛିଣ୍ଡାନ୍ତୁ ନାହିଁ :
ବେଲପତ୍ର ତୋଳିବା ବା ଛିଣ୍ଡାଇବା ବେଳେ ସର୍ବଦା ଭଗବାନ ଶିବଙ୍କୁ ଧ୍ୟାନ କରିବା ଉଚିତ। ତାପରେ ବେଲ ବୃକ୍ଷ ନିକଟରେ ଛିଡା ହୋଇ ପ୍ରଣାମ କରି ପତ୍ର ଛିଣ୍ଡାନ୍ତୁ। ବେଲ ପତ୍ରକୁ ଅମାବାସ୍ୟା, ଚତୁର୍ଥୀ, ଅଷ୍ଟମୀ, ନବମୀ ଓ ଚତୁର୍ଦ୍ଦଶୀରେ ତୋଳିବା ଅନୁଚିତ। ସର୍ବଦା ତିନୋଟି ବେଲ ପତ୍ର ସମ୍ମିଳିତ ହୋଇଥିବା ପତ୍ରକୁ ଶିବଲିଙ୍ଗରେ ଚଢାଇବା ଉଚିତ।
ବେଲପତ୍ର ବାସୀ ହୁଏ ନାହିଁ :
ବେଲପତ୍ର ଏପରି ଏକ ପତ୍ର ଯାହା କେବେ ବି ବାସୀ ହୁଏ ନାହିଁ। ଭଗବାନ ଶିବଙ୍କ ପୂଜାରେ ବିଶେଷ ଭାବେ ବ୍ୟବହାର କରାଯାଉଥିବା ବେଲ ପତ୍ର ବିଷୟରେ ଶାସ୍ତ୍ରରେ ଉଲ୍ଲେଖ କରାଯାଇଛି। କୁହାଯାଇଛି ଯେ, ପୂଜା ପାଇଁ ନୁଆ ବେଲ ପତ୍ର ଉପଲବ୍ଧ ନ ହେଲେ ପୁରୁଣା ପତ୍ରକୁ ଧୋଇ ଶିବଲିଙ୍ଗରେ ଚଢାଇ ପାରିବା।
ବେଲପତ୍ର ଅର୍ପଣ କରିବାର ବିଧି :
ବେଲପତ୍ରକୁ ସର୍ବଦା ଅନାମିକା ଓ ମଧ୍ୟମା ଆଙ୍ଗୁଠୀର ସାହାଯ୍ୟରେ ଶିବଲିଙ୍ଗରେ ଅର୍ପଣ କରିବା ଉଚିତ। ଶିବଲିଙ୍ଗରେ ବେଲପତ୍ର ଚଢାଇବା ସହ ଜଳ ମଧ୍ୟ ତା ସହ ଅର୍ପଣ କରନ୍ତୁ। କେବେ ବି ଫାଟି ଯାଇଥିବା ବେଲପତ୍ର ଚଢାଇବା ଉଚିତ ନୁହେଁ।
ବେଲପତ୍ରର ମହତ୍ତ୍ବ :
ଶିବ ପୁରାଣ ଅନୁସାରେ, ଭଗବାନ ଶିବଙ୍କୁ ବେଲପତ୍ର ଚଢାଇବା ଦ୍ବାରା ଦରିଦ୍ରତା ଦୂର ହୋଇଥାଏ। ଏହାସହ ସୌଭାଗ୍ୟ ପ୍ରାପ୍ତି ହୋଇଥାଏ। ବେଲ ପତ୍ରରେ କେବଳ ଭଗବାନ ଶିବ ନୁହେଁ ହନୁମାନ ମଧ୍ୟ ପ୍ରସନ୍ନ ହୋଇଥାଆନ୍ତି। ଘରର ବଗିଚାରେ ବେଲ ଗଛ ରହିବା ଦ୍ବାରା ପରିବାର ସଦସ୍ୟମାନେ ପାପରୁ ମୁକ୍ତି ପାଇଥାଆନ୍ତି। ଏହାସହ ପୁଣ୍ୟ ପ୍ରାପ୍ତି ହୋଇଥାଏ।
