ବେଗୁନିଆ -ବେଗୁନିଆ ବ୍ଲକ ଡିଙ୍ଗର ପଞ୍ଚାୟତ ଅନ୍ତର୍ଗତ ଲେହଙ୍ଗ ଡାଳଖାଇ ଜଙ୍ଗଲରେ ବିଭିନ୍ନ ପ୍ରକାର ପଶୁପକ୍ଷୀ ରହୁଥିବାବେଳେ ସରକାର ସେମାନଙ୍କ ସୁରକ୍ଷା ପ୍ରତି ଦୃଷ୍ଟି ଦେଉନାହାନ୍ତି । ଫଳରେ ଜଙ୍ଗଲ ରେ ରହୁଥିବା ଜୀବଜନ୍ତୁଙ୍କ ଜୀବନ ବିପଦପୂର୍ଣ୍ଣ ଅବସ୍ଥାରେ । କେତେବେବେଳେ ଶିକାରୀମାନେ ସେମାନଙ୍କୁ ଶୀକାର କରି ମାରି ସେମାନଙ୍କର ମାଂସ ଏବଂ ଶରୀରର ବିଭିନ୍ନ ଅଙ୍ଗ ପ୍ରତେଙ୍ଗ ବିକ୍ରି କରି ଅର୍ଥ ଉପାର୍ଜନ କରୁଥିବା ଅଭିଯୋଗ ହୋଇଛି । କେତେବେଳେ ସେମାନେ ଖାଦ୍ୟ ଏବଂ ଜଳ ପାଇଁ ଗ୍ରାମାଭିମୁଖୀ ହୋଇ ପରିତ୍ୟକ୍ତ କୂଅ ପୋଖରୀରେ ପଡି ମୃତ୍ୟୁ ହେଉଛି । ଲେହଙ୍ଗ ଗ୍ରାମର ମାଧବ ଚନ୍ଦ୍ର ବେହେରାଙ୍କ ବିଲରେ ଥିବା ଏକ ପରିତ୍ୟକ୍ତ ଚୁଆରେ ଗୋଟିଏ ବାରହା ପଡି ତାହାର ମୃତ୍ୟୁ ହୋଇଛି । ଗନ୍ଧ ହେବାରୁ ଏବଂ ଲୋକମାନେ ସେହି ଚୁଆକୁ ମାଛ ମାରିବା ପାଇଁ ଯିବାବେଳେ ଆଜି ଏହି ଘଟଣା ଦେଖିବାକୁ ପାଇଥିଲେ । ଗତ କିଛି ଦିନ ତଳେ ଅନ୍ୟ ଏକ ଜଙ୍ଗଲୀ ବାରାହା ଗାଁର ନୂଆ ପୋଖରୀରିରେ ପଡି ତାହାର ମୃତ୍ୟୁ ହୋଇଥିଲା ।
ଜଙ୍ଗଲରେ ବହୁ ସଂଖ୍ୟାରେ ବାରହା ,ସାଳିଆପତନୀ ,ଗାଡ଼ଭାଲୁ ,ଝିଙ୍କ, ଠେକୁଆ, ଗଧିଆଙ୍କ ସହିତ ବିଭିନ୍ନ ପ୍ରକାର ପକ୍ଷୀ ବାସ କରୁଛନ୍ତି । ଏହି ଜଙ୍ଗଲ ଔଷଧ ବୃକ୍ଷ ରାଜିରେ ଭରପୁର ହୋଇ ରହିଛି । ବିଭିନ୍ନ ସମୟରେ ଆୟୁର୍ବେଦ ବୈଦ୍ୟମାନେ ଏହି ଜଙ୍ଗଲରୁ ଚେରମୁଳି ସଂଗ୍ରହ କରୁଥିବାର ଦେଖିବାକୁ ମିଳିଥାଏ । କିନ୍ତୁ ଏବେ ଜୀବଜନ୍ତୁଙ୍କ ଭୟରେ ଜଙ୍ଗଲରେ କେହି ପଶିବାକୁ ସାହସ କରି ପାରୁ ନାହାନ୍ତି । ଏହି ଜଙ୍ଗଲ ପାର୍ଶ୍ଵରେ ମା ଡାଳଖାଇଙ୍କ ଜରାଜୀର୍ଣ୍ଣ ଅବସ୍ଥାରେ ପଡିଥିବା ମନ୍ଦିରରେ ବିଭିନ୍ନ ସମୟରେ ବିବାହ ,ବ୍ରତ, ଏବଂ ନିର୍ବନ୍ଧ କାର୍ଯ୍ୟରେ ଲୋକମାନଙ୍କର ସମାଗମ ହେଉଥିବାବେଳେ ସଭା ସମିତି ଯୋଗୁଁ ଲୋକମାନଙ୍କ ଗହଳି ହୋଇଥାଏ । ଲେହଙ୍ଗ ଗ୍ରାମର ଜନବସତି ନିକଟରେ ଏହି ଜଙ୍ଗଲ ଏବଂ ଠାକୁରାଣୀଙ୍କ ମନ୍ଦିର ଥିବାରୁ ଲୋକମାନଙ୍କର ସମାଗମ ଦେଖି ପଶୁପକ୍ଷୀ ମାନେ ଖାଦ୍ୟ ଅନ୍ୱେଷଣରେ ମନ୍ଦିର ଏବଂ ଗ୍ରାମ ନିକଟକୁ ଚାଲି ଆସୁଛନ୍ତି । କିନ୍ତୁ ଖାଦ୍ୟ ବଦଳରେ ଶିକାରୀ ସେମାନଙ୍କୁ ଶିକାର କରୁଛନ୍ତି ।
ଜଙ୍ଗଲ ସହ ଏହି ପଶୁପକ୍ଷୀଙ୍କ ସୁରକ୍ଷା ପାଇଁ ସ୍ଥାନୀୟ ବାସିନ୍ଦା ଦାବି କରିଛନ୍ତି ।
