ବେଗୁନିଆ:ବେଗୁନିଆ ଥାନା ଅଞ୍ଚଳରେ ମାଦକ ଦ୍ରବ୍ୟର କାରବାର ଦିନକୁ ଦିନ ବୃଦ୍ଧି ପାଇବାରେ ଲାଗିଛି। ନାମୀ ଦାମୀ ବିଦେଶୀ କମ୍ପାନୀ ନାମରେ ନକଲି ମଦ ବିକ୍ରି ହେଉଛି । ଏପରିକି ଗାଁ ଗାଁ ରେ ଦେଶୀ ମଦ ପ୍ରସ୍ତୁତ କରାଯାଇ ବାହାର ଅଞ୍ଚଳକୁ ପଠା ଯାଉଛି । ଦେଶୀ ମଦ ପ୍ରସ୍ତୁତି ଏଠାରେ କୁଟୀର ଶିଳ୍ପରେ ପରିଣତ ହୋଇଛି। ଗତ ୧୦ ତାରିଖରେ ବେଗୁନିଆ ଅବକାରୀ ଥାନା ଭାରପ୍ରାପ୍ତ ଅଧିକାରୀ ସୁଜିତକୁମାର ମୁଦୁଲି ଏବଂ ଖୋର୍ଦ୍ଧା ରେଞ୍ଜ ଇନିସପେକ୍ଟର ଭୈରବ ସାହୁ ବେଗୁନିଆ ଥାନା ଅନ୍ତର୍ଗତ ଗଡମାଣତୀର ,ରାସୋଳ ,ସାନପଦର ଏବଂ ବାଁକୋଇରେ ଚଢ଼ାଉ କରି ୬ ହଜାର ଲିଟର ପୋଚ ନଷ୍ଟ କରି ୩୮୫ ଲିଟର ଦେଶୀ ମଦ ଜବତ କରିବା ସହିତ ୩ ଜଣଙ୍କୁ ଗିରଫ କରିଥିଲେ।
ଗୋଟିଏ ଦିନ ପରେ ଆଜି ବେଗୁନିଆ ଥାନା ଅନ୍ତର୍ଗତ ଚଟୁଆ ଦେବୀପ୍ରସାଦ ଆଦିବାସୀ ସାହିରେ ଖୋର୍ଦ୍ଧା ରେଞ୍ଜ ଇନିସ୍ପେକ୍ଟର ଭୈରବ ସାହୁଙ୍କ ନେତୃତ୍ୱରେ ବେଗୁନିଆ ଅବକାରୀ ଥାନା ଭାରପ୍ରାପ୍ତ ଅଧିକାରୀ ସୁଜିତକୁମାର ମୁଦୁଲି , ଜିଲ୍ଲା ମୋବାଇଲ ସ୍କ୍ୱାର୍ଡର ଇନିସପେକ୍ଟର ସସ୍ମିତା ହୋତା ଏବଂ ଆଇଆରବି ଫୋର୍ସ ଆଜି ସକାଳେ ଚଢ଼ାଉ କରିଥିଲେ। ଚଢ଼ାଉ ସମୟରେ ନଳିତା ଦେହୁରୀ(୩୨)ଙ୍କ ଘରୁ ୬୨୫ ଲିଟର ଏବଂ କୃଷ୍ଣ ଦେହୁରୀଙ୍କ ଘରୁ୨୨ଲିଟର ଦେଶୀ ମଦ ଜବତ କରି ଉଭୟଙ୍କୁ ଗିରଫ କରିଥିଲେ।
