ଖଣ୍ଡଗିରି, : ଗତ ଦୁଇ ଦିନ ଭିତରେ ପୃଥକ ସ୍ଥାନରେ ସଞ୍ଜବତୀରେ ପୋଡ଼ି ହୋଇ ଦୁଇ ମହିଳା ଗୁରୁତର ହୋଇଛନ୍ତି। ଗୁରୁତର ହୋଇଥିବା ମହିଳା ହେଲେ ଇନଫୋଭ୍ୟାଲି ଥାନା ଅନ୍ତର୍ଗତ ଯାଁଳା ପଞ୍ଚାୟତ ରାଧାଚରଣପୁର ଗ୍ରାମର ରାଜଶ୍ରୀ ବେହେରା (୨୩) ଓ ସଚଳ ସାମନ୍ତରାୟ (୭୩)। ସଞ୍ଜ ଦେବା ସମୟରେ ଲୁଗାରେ ନିଆଁ ଲାଗି ଯାଇଥିଲା। ଉଭୟଙ୍କୁ ଚିକିତ୍ସା ପାଇଁ ଡାକ୍ତରଖାନାରେ ଭର୍ତ୍ତି କରାଯାଇଛି।
ମିଳିଥିବା ସୂଚନା ଅନୁସାରେ, ଗତ ଶନିବାର ଧନୁ ସଂକ୍ରାନ୍ତି ଥିଲା। ରାଜଶ୍ରୀ ଚଉଁରା ପାଖରେ ସଞ୍ଜ ଦେଇ ମୁଣ୍ଡିଆ ମାରିବା ସମୟରେ ତାଙ୍କ ଲୁଗା କାନିରେ ନିଆଁ ଲାଗି ଯାଇଥିଲା। ପ୍ରାୟ ୫୦ ପ୍ରତିଶତ ସେ ପୋଡ଼ି ଯାଇଥିଲେ। ତାଙ୍କ ପାଟି ଶୁଣି ପରିବାର ଲୋକ ଆସି ଉଦ୍ଧାର କରି ଚିକିତ୍ସା ପାଇଁ ଡାକ୍ତରଖାନା ନେଇଥିଲେ। ସେହିଭଳି ରବିବାର ବୃଦ୍ଧା ସଚଳ ଠାକୁର ଘରେ ସନ୍ଧ୍ୟା ଆଳତୀ କରୁଥିଲେ। ତାଙ୍କ ଲୁଗାରେ ଦୀପ ନିଆଁ ଲାଗି ଯାଇଥିଲା। ଏହି ନିଆଁରେ ସଚଳା ପୋଡି ହୋଇ ଗୁରୁତର ହୋଇ ଥିଲେ। ଅଣ୍ଟା ଠାରୁ ପାଦ ପର୍ଯ୍ୟନ୍ତ ପୋଡ଼ି ଯାଇଥିବା ବେଳେ ଅନେକ ସ୍ଥାନରେ ଫୋଟକା ହୋଇଯାଇଥିଲା। ଉଭୟ ମହିଳା ଏବେ ଚିକିତ୍ସାଧୀନ ଅଛନ୍ତି।
