ଭୁବନେଶ୍ବର : ରାଜଧାନୀରେ ଛାତିଥରା ଦୁର୍ଘଟଣା ଘଟାଇ ଦୁଇ ଦୁଇଟି ଜୀବନ ନେଇଥିବା ଅଭିଯୁକ୍ତ ଚାଳକକୁ କ୍ୟାପିଟାଲ ଥାନା ପୁଲିସ ଗିରଫ କରି ଅଦାଲତ ଚାଲାଣ କରିଛି। ଗିରଫ ଅଭିଯୁକ୍ତ ନନ୍ଦନକାନନ ଥାନା ରଘୁନାଥପୁର ରାଜମନୋହର ରେସିଡେନ୍ସିରେ ରହୁଥିବା ଖୋର୍ଦ୍ଧା ଜିଲା ଟାଙ୍ଗି ଥାନା ମଙ୍ଗଳାଯୋଡ଼ିର ଲଲାଟେନ୍ଦୁ ବାରିକ। ସୂଚନାଯୋଗ୍ୟ, ଅନିଲ କୁମାର ନାୟକ ତାଙ୍କ ଅଭିଯୋଗରେ ଦର୍ଶାଇଛନ୍ତି, ଶନିବାର ଅପରାହ୍ଣରେ ତାଙ୍କ ବାପା ଓ ଦାଦା ଦୁହେଁ ଏକ ମୋଟରସାଇକଲରେ ଗୋପବନ୍ଧୁ ଛକ ପାର୍ଶ୍ବରୁ ରାଜଭବନ ଅଭିମୁଖେ ଯାଉଥିଲେ। ଅପରାହ୍ଣ ପ୍ରାୟ ସାଢ଼େ ୫ଟାରେ ଅଭିଯୁକ୍ତ ପାୱାର ହାଉସ ଛକ ପାର୍ଶ୍ବରୁ ଏକ କାର୍କୁ ବେପରୁଆ ଭାବେ ଦ୍ରୁତ ଗତିରେ ଆଣି ରାଜଭବନ ଛକ ନିକଟରେ ଖୁବ୍ ଜୋରରେ ତାଙ୍କ ମୋଟର ସାଇକଲକୁ ଧକ୍କା ଦେଇଥିଲା। ଏଥିରେ ଭାରସାମ୍ୟ ହରାଇ ଉଭୟେ ତଳେ ପଡ଼ିଯିବା ପରେ ଅନିଲଙ୍କ ଦାଦାଙ୍କ ଉପରେ କାର୍ଟି ସମ୍ପୂର୍ଣ୍ଣ ଭାବେ ଚଢ଼ିଯାଇଥିଲା। ଅନ୍ୟ ଏକ ମୋଟରସାଇକଲରେ ଯାଉଥିବା ଜଣେ ବ୍ୟକ୍ତି ମଧ୍ୟ ଏହି ଘଟଣାରେ ଗୁରୁତର ହୋଇଥିଲେ। କ୍ୟାପିଟାଲ ଥାନା ପୁଲିସ ଘଟଣାସ୍ଥଳରେ ପହଞ୍ଚି ଭିଡ଼ ନିୟନ୍ତ୍ରଣ କରିବା ସହ ଆହତଙ୍କୁ ତୁରନ୍ତ ଚିକିତ୍ସା ପାଇଁ ହସ୍ପିଟାଲକୁ ସ୍ଥାନାନ୍ତର କରିଥିଲେ। ଡାକ୍ତର ଅନିଲଙ୍କ ଦାଦାଙ୍କୁ ମୃତ ଘୋଷଣା କରିଥିଲେ ଏବଂ ବାପା ଚିକିତ୍ସାଧୀନ ଅବସ୍ଥାରେ ପ୍ରାଣ ହରାଇଥିଲେ। ଅନ୍ୟ ଆହତ ଯୁବକଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ କ୍ୟାପିଟାଲ ହସ୍ପିଟାଲରୁ ଏମ୍ସ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା। ଏହି ଘଟଣାରେ ପୁଲିସ କାର୍ ଚାଳକକୁ କାବୁ କରିବା ସହ ଦୁର୍ଘଟଣାଗ୍ରସ୍ତ କାର୍ ଓ ମୋଟରସାଇକଲକୁ ଜବତ କରିଥିଲା।
Comments are closed.