ଦୁଇ ହଜାର ଟଙ୍କା ନୋଟ କାରବାରରେ ତିନିଜଣ ଗିରଫ

ବାସୁଦେବପୁର : ଦୁଇ ହଜାର ଟଙ୍କା ନୋଟ କାରବାରରେ ବାସୁଦେବପୁର ପୁଲିସ ତିନି ଜଣଙ୍କୁ ଗିରଫ କରିଛି । ସେମାନଙ୍କ ଠାରୁ ନଗଦ ଅର୍ଥ ରାଶି ଜବତ କରିଥିବା ବେଳେ ମାଷ୍ଟରମାଇଣ୍ଡଙ୍କ ଠାରୁ ନକଲି ପ୍ରେସ ଆଇଡି କାର୍ଡ ପୁଲିସ ଜବତ କରିଛି । ସୂଚନାନୁଯାଇ,ଏହି ଘଟଣାର ମାଷ୍ଟରମାଇଣ୍ଡ କୁହାଯାଉଥିବା ନବରଙ୍ଗପୁର ଜିଲ୍ଲା ତେନ୍ତୁଳିଖୁଣ୍ଟି ଥାନା ଅଞ୍ଚଳର ସୁବଳକୁମାର ଚୈଧୂରୀ (୫୬)ଙ୍କ ସହ ବାସୁଦେବପୁର ଥାନା ଅଞ୍ଚଳ ବୈକୁଣ୍ଠପୁର ଗ୍ରାମର ଲକ୍ଷ୍ମୀଧର ପତି(୪୨)ଙ୍କ ଯାଜପୁର ଠାରେ ଦେଖା ସାକ୍ଷାତ ହୋଇଥିଲା। ଏହି ସମୟରେ ଖଣ୍ଡିଏ ଦୁଇହଜାର ଟଙ୍କିଆ ନୋଟ ପାଇବାକୁ ହେଲେ ବଦଳରେ ଦଶ ହଜାର ଟଙ୍କା ଦେବାକୁ ପଡିବ ।
ଏହିପରି ଦୁଇଖଣ୍ଡ ଦୁଇହଜାର ଟଙ୍କିଆ ନୋଟ ଘରେ ରଖିଲେ ଅଟକିଥିବା କାମ ଅବିଳମ୍ବେ ହୋଇଯିବ ବୋଲି ମାଷ୍ଟରମାଇଣ୍ଡ ଜଣକ କହିଥିଲା । ସେହି ଅନୁସାରେ ଏହି କାରବାରକୁ ଆଗକୁ ନେବା ପାଇଁ ଯୋଜନା ଚାଲିଥିବା ବେଳେ ନାଇକାଣିଡିହ ଥାନା ଅଞ୍ଚଳ କ୍ଷେମପୁର ଗ୍ରାମର ଦିଲ୍ଲିପକୁମାର ରାଉତ ବାସୁଦେବପୁର ପୁଲିସକୁ ଜଣାଇଥିଲେ । ଖବରପାଇ ବାସୁଦେବପୁର ପୁଲିସ ଘଟଣାସ୍ଥଳରେ ପହଞ୍ଚି ମାଷ୍ଟରମାଇଣ୍ଡଙ୍କ ସମେତ ବେକୁଣ୍ଠପୁର ଗ୍ରାମର ହାକିମଦ୍ଦୁନ ଖାନଙ୍କ ପୁଅ ପତି ଖାନକୁ କାବୁ କରିଥିଲା । ଏହି ସମୟରେ ଏକାବନ ଖଣ୍ଡ ଦୁଇହଜାର ଟଙ୍କିଆ ନୋଟ, ତିରିଶ ଖଣ୍ଡ ପାଞ୍ଚଶହ ଟଙ୍କିଆ ନୋଟ ସମେତ ମୋଟ ଏକଲକ୍ଷ ପନ୍ଦର ହଜାର ଟଙ୍କା ଜବତ କରିଛି । ତେବେ ଏକଲକ୍ଷ ଦୁଇ ହଜାର ଟଙ୍କା କାରବାର କରାଯିବା ପାଇଁ ରହିଥିଲା ବୋଲି ପୁଲିସ ତଦନ୍ତ ସମୟରେ ଜାଣିବାକୁ ପାଇଛି ବୋଲି ଜଣାଇଛି । ତେବେ ଜବତ କରାଯାଇଥିବା ନୋଟର ସିରିୟଲ ନମ୍ବରକୁ ନେଇ ପୁଲିସ ଚକିତ ହୋଇଛି ।